Hel pawl ni ngeia rinten Inrinni tlai khan Manipur-a chanchinbu lian ber pisa, Keishampat, Imphal West district-a mi chu hand grenade hmangin an bei.
Grenade hi tu nge a nih hriat lohvin ‘Poknapham’ chanchinbu pisaah hian a vawm a; mahse, a puak lo hlauh.
Police chuan he thil hi zan dar 6:30 vela thleng a nih thu an sawi a. A bul lawkah hian a safety pin pawh an chhar thu police chuan an sawi.
CCTV atanga a lan dan chuan grenade hi hmeichhe vawm a ni a. Police zinga bomb lam thiamten grenade hi an la sawn.
Manipur police hian a titu hi an zawng nghal mek tih an sawi a. Tumah man an la nei lo.
He thil thleng avang hian chanchinbu lam pisa zawng zawngah venhimna khauh zawk pek a ni.
Poknapham editor, Aribam Robindro Sharma chuan eng invauna mah an dawn loh thu a sawi.
All Manipur Working Journalist Union (AMWJU) leh Editor’s Guild Manipur (EGM) chuan he thil thleng an dem thu an sawi.
Nimin khan thil thleng duh lohna lantir a ni a, kal zel dan tur pawh an la rel ang.