Premier League champion lai Manchester City in an dan pangngai ang bawkin an khingpui an nghaisa a. AFC Bournemouth lakah goal li an khung. Tun nipuia insiamthat tuma che nasa tak Arsenal pawhin bul an tan that an chhunzawm a, Leicetser City lakah 4-2 in an chak.
Anni ang bawka tum sang tak nei Manchester United erawhin first half-ah goal li an chhuah a, tun kartawp inkhelah Brentford lakah an mualpho.Haaland a ngai kher lo
Manchester City in Pound maktaduai 51.2 in khawvela striker ngaihven hlawh ber zing ami Erling Haaland an lalut a, kar hmasa ah goal hnih a khung nghal.
Bournemouth lakah erawh vengtu a ngah a, penalty area chhungah vawi 8 chauh ball a khawih chungin City an buai phah lova, 4-0 in Cherries an hneh.
Etihad Stadium-ah City in an mikhualte an nawr na a, goal hlauhawm insiam an harsat lo. Hlauhawm an siam zeuh zeuh hnuah minute 18-naah Haaland-a’n a ball khawih hmasak ber chu Ilkay Gundogan goal khung tur siamsak nan a hmang.
Minute 31-naah City thiampuipa Kevin de Bruyne chuan goal ropui a khung a, a thiam rah amah bawkin a seng. Minute 37-naah Phil Foden chuan goal khung belhin second half-ah Jefferson Lerma own goal an neih belh.
City boss Pep Guardiola chuan Haaland chungchang bik sawiin, “Erling-a hna hi khawvela hautak ber pawl a ni a, team-ah defender pathumin an hual reng. Hun a la duh deuh dawn a, mahse kan inkhelhdan a inman chho zel anga, player tha kan nei bawk a, remchang hi chu a la hmu hnem ang.” a ti.“Jesus, take the wheel”
Arsenal in nipui laiin Brazilian striker Gabriel Jesus chu Manchester City atangin an lalut a, an ti fuh nghal.
Premier League a Arsenal tana a goal hmasa pahnih khungin Leicester City a nghaisa a, 4-2 in Gunners an chak.
Brazilian forward in minute 23-na leh 35-naah goal a khung a. William Saliba own goal hmangin goal chhuah zui mahse Granit Xhaka leh Gabriel Martinelli ten goal khungin James Maddison chuan Foxes tan goal khat a khung ve bawk.
Arsenal manager Mikel Arteta chuan, “Gabi hian a tih theih kan hria, goal hnih leh assist a nei chungin goal li khung thei a nih vangin a la lungawi lo. Hei hi a rilru puthmang a ni a, team hmasawnna tura chawi kangtu rilru pu a ni.” a ti.Man United mualpho
Brentford in first half-ah United an timualpho a, fakawm taka football an khelh rualin United an nawi ral raih a. First half a goal li an khung chu 4-0 in an chakpui.
Gtech Community Stadium-ah United an pherh hle a, minute 10-naah Josh Dasilva ball pet pangngai tak chu David de Gea in tisual in dang thei lo.
Spanish goalkeeper bawk a che buai leh a, a hnung atanga ball inpek chhuah an tum chu Christian Eriksen ball a pe a, Mathias Jensen-a’n ball chhuhsak nghalin an goal hnihna a khung leh a. Ben Mee leh Bryan Mbeumo ten minute 30-na leh 35-naah Thomas Frank-a pawlte tan goal an khung leh bawk.
United hi a zawna vawi sarih away inkhela an tlawmna a ni a. Season hmasa atang goal li an chhuah tlin vawi sarihna a ni tawh.
“Vawiin aiin kan theihna a sang tih kan lantir a ngai. Team angin hun khirh takah kan awm mek a, khatiang bul tan kha kan beisei bik lo.” coach Erik ten Hag chuan a ti.