Indore, Madhya Pradesh-ah Inrinni khan world record thar siam niin mihring ding khawm hmangin India map lem siam a ni.
An thiltih hi World Book of Record-ah tar lan a ni dawn a, khawvela mihring awm khawm hmanga ram map siam lian ber a ni a, India-in zalenna a neih kum 75-na lawmna kal zel, Azadi Ka Amrit Mahotsav puala an tih a ni.
Social institution pakhat, Jwala-in Divya Shaktipeeth-a an huaihawt niin sikul naupang 5000 chuang, social worker leh mi dang eng emaw zat an tel a ni.
Jwala dintu, Dr. Divya Gupta chuan mihring pungkhawmin map an siam lian ber record siam ngei tuma an tih a nih thu a sawi.
“Mihring awm khawm hmangin India map kan siam a, a ramri chauhva inzawm lovin a chhungah pawh kan awm vek a. Tun hmain ramri zai zai chauhva dinga map siam a lo ni tawh a, keini erawh a chhungah dingin Hnam Puanzar kan tilang a, a laiah Ashok Chakra pawl kan lantir bawk a. Mi 5,335 zet he thilah hian an tel a ni,” a ti.
“Ramri-ah Shri Shakti tilangin hei hi India-a hmeichhiate pawimawhna leh theihna tihlanna a ni bawk,” a ti.
August 15 hian India chuan zalenna a neih kum 75-na a lawm dawn a, kawng hrang hrangin he ni hi lawm mek zel a ni.
AKAM hi sorkar laipui ruahmannaa kalpui niin zalenna lawm nan in tina Hnam Puanzar zar, ‘Har Ghar Tiranga’ tura tih a ni.
AKAM hi March 12, 2021-a tan niin zalenna champhaah hian chawlhkar 75 a tling dawn chiah a. Indian-te inunau lehzuala awmtir tuma beihn chi khat a ni.