Lehkhabu ziaktu lar, Salman Rushdie chu vih a nih hnuah ventilator hmang lovin a awm thei ta a, tawng pawh a tawng leh thei tawh.
Kum 75 mi, Rushdie-a hi New York, United States-a amah an kawmnaah dawhsana a awm laiin beih a ni a, dinhmun derthawng takah a awm a ni.
A thawnthu (novel) ziah, The Satanic Verses avangin kum tam tak chhung thaha vauna a lo tawng tawh a, Muslim tam takin an sakhua tibawrhbangah an ngai.
Zirtawpnia amah vittu hi tualthah tuma puh niin bail phal lohvin police-in an la kawl mek.
Kum 24 mi, Hadi Matar-a hi dawhsanah tlan lawnin Rushdie-a hi a hmai, nghawng leh a dulah vawi 10 vel a vit a ni.
Beih a tawh hnuah hian a agent Andrew Wylie chuan novelist hian a bân lehlama hriatna thazam a chhia a, a thin chhiain a mit lehlam a chân mai thei tih a sawi.
Amah kawmtu, Henry Reese pawhin a lu-ah hliam tenau a tuar a. Ani hi hlawkna um lo pawl, ziakmiten vauna an tawhna laka an him theihna tura beitu dintu pakhat a ni.
Beih a nih hma hian Rushdie-achuan US chu ziakmite tana hmun nuam a nih thu a sawi.
Novelist hi kum 1988-a The Satanic Verses tihchhuah a nih hnu kum 10 dawn chu vauna avangin a tawm bo va. Muslim tam tak chuan an zawlnei, Prophet Muhammad tibawrhbangah an ngai a ni.
Thah tuma vauna dawngin hetih hun laia Iranian hruaitu, Ayatollah Ruhollah Khomeini chuan a that thei hnenah $ maktaduai 3 lai pek a tiam nghe nghe.
A luman an chhiar hi tun thlengin a la nung reng a, hetih lai hian Iranian sorkar chu Khomeini-a intiamnaah hian a tel ve lo thung.
Rushdie-a hi Bombay, India-ah kum 1947 khan a piang a. England-a lehkha zir tura kalin University of Cambridge-ah history a zir thin a. Kum 2007 khan thu leh hla lama a thawhhlawk avangin knight nihna pek a ni.
Zirtawpnia beih a tawh hian amah thlawptu an tam hle a, beihna chu demin miin a duh a sawi leh a puan theihna tihchhiatsak leh dansak chu a dik lo tih an sawi hlawm.Rushdie-a beitu
Zirtawpnia lehkhabu ziaktu lar beitua rinhlelha man hian a tih ngei a nih thu a inpuang tawh a, a tunhma chanchin hriat tur erawh a tam lo hle.
Fairview, New Jersey-a cheng, Matar hi US-a piang a ni a, a nu leh pa hi Lebanon atanga pem lut niin Lebanese thuneitute chuan thuthar lakhawmtute hnenah an sawi.
A social media account-ah chuan Iran-a sipai pawl thiltithei tak, Islamic Revolutionary Guard Corps (IRG)-a thuk taka inhnamhnawih niin NBC News chuan a tar lang.
Police chuan hetianga Rushdie-a a beih chhan hi an la sawi lo va, inbeihna thlenna hmuna ip (backpack) leh a chhunga electronic device an hmuhte an zir chian zawhah thil chiang zawk an hriat theih an inbeisei.
Matar-a hi sipai, politics leh eibar lama Iran-a Supreme Leader, Ayatollah Ali Khamenei leh an sorkara langsar tak takte nena inzawm, IRG nen hian an inzawm em tih pawh an hre lo.