VL Zaithanzama, Aizawl West III bialtu MLA chuan Zirtawpni chawhnu khan a bial chhung, Mission Vengthlanga Health Sub Centre tlawhin an mamawh computer set a pe.
VL Zaithanzama hian a bial chhunga zirna in hrang hrang leh sub centre-te tlawh zelin mamawh an thlente a theih ang angin a ngaihtuahsak a, Mission Vengthlang Health Sub Centre hnathawktute chuan a vawi khat nana MLA tlawhtu leh thilpek petu an nei chu lawmthu an sawi.
Aizawl West III bialtu MLA chuan, “Zirna in, a bikin pawl hniam lam leh sub centre hi kal kân leh hlamchhiah an awl a, an pawimawhzia leh tihchangtlun an mamawh zia te, veng leh khaw mipuite tana an tangkai ziate hi kan hriat thar a pawimawh takzet a ni,” tiin ram hmasawnna tura a bul pawimawh, ngaih pawimawh hmasak ber tur an ni a ti.