Thubuai hrang hrang rang zawka chin felna, National Lok Adalat chu ram chhung hmun dang rualin Inrinni khan Mizoramah pawh neih a ni a, thubuai 1,500 chuang chin fel a ni.
Lok Adalat hi Gauhati High Court (Aizawl Bench) bakah New Secretariat Complex-a Mizoram State Legal Services Authority pisa leh district hrang hrangah neih a ni a, thubuai 2,500 chuang ngaihtuah a ni a, chung zinga 1,500 chuang rel fel a ni.
Thubuaite hi atlangpuiin bank loan leiba te, mi mal inkara pawisa inpuk thubuai te, chhungkua rosum leh pai inchuh thubuai bakah in hmun lo ram thubuai leh criminal compoundable case te pawh rel a ni a; thubuai rel fel hlut zawng (settled amount) chu Rs. Vaibaichhe li chuang a tling a ni.
Mizoram State Legal Services Authority pisaa National Lok Adalat neih chu Justice Michael Zothankhuma, Gauhati High Court Judge leh Mizoram State Legal Services Authority-a executive chairman ni bawk chuan Guwahati atangin a endik a, conciliator te leh thawktu dangte nen inhmuhkhawmna remchang tak a siam.
Hriat belh tulte a hnena atangin ngaihthlak a ni bawk. Lok Adalatin thubuai a relnaah hian sumpai senga ukil rawih a ngai lo va, thubuai rem dan pawh inrem siamna a kalpui a nih avangin inkhingte inkarah pawh inhmuhmawh zuina a awm ve loh avangin Mizote rilrem zawng tak rorelna a ni.