Aizawl: Mizoram Pradesh Congress Committee (MPCC) chuan nimin chawhma khan India-in zalenna a hmuh champha vawi 76-na pualin Congress Bhavan kawtah hun an hmang a, President Lalsawta’n hnam puanzar a pawt pharh.
Hnam puanzar pawh pharh zawh hian Golden Hall, Congress Bhavan-ah Independence Day lawmna hun an hmang zui a. He hunah thu sawiin MPCC President Lalsawta chuan, khawvela ram hrang hrangte hi Pathianin thil pahnih - ram leh mipui a pe vek a, a enkawltute a zirin nasa takin a danglam thei tih sawiin, “North Korea chu a enkawltu ram hruaitute'n an zir loh avangin khawvela ram hrehawm berte zinga ngaih a ni. Chutih laiin, an thenawm South Korea chu khualzinte tlawh chak khawvela ram nuam leh zalen berte zing a mi a ni. Heng ram pahnihte thil neih hi a inang deuh vek chungin an dinhmun a inthlau em em a ni. A enkawltu pawimawh zia hei hian a tar lang chiang hle a ni,” a ti.
RL Vala, Gen. Secretary kaihhruai inkhawmah Lalsawta hian, “Kum 20 chhung ram buai vangin mi state hnungah tlai taka kan kal ve chungin tunah chuan state dang kan tluk chho ve tan ta. Heng hmasawnna tam zawk hi Congress kaihhruai sorkar din a ni. Duhthusam leh sawiselbo erawh a ni lo tih kan hria. Tun hma atanga kan ram kal tawh dan en ila, Congress hian siamthatna kan thawh leh a ngai a ni,” a ti bawk.
Congress president hian MNF-in Mizoram an sawp chhiat nasat dan sawi nan hian minute khat pawh a ui tawh tih a sawi a. ZPM hi mi tam takin an rin tlat loh avang hian kum 2023 inthlanpui lo awm turah hian rilru dik leh fel tak pua a chhe lai siamtha tura tih tak zeta an thawh chuan Mizoram hi an siam tha thei tih a sawi.