Aizawl: MNF chuan Chief Minister Zoramthanga kaihhruai sorkarin hmasawnna atana pawimawh a nih hriaa kawng a ngaih pawimawh dan leh Congress sorkarin kawng a ngaih pawimawh dan chu lei leh van ang maia danglam a ni tih an sawi.
Tunlai kawng chhia hi MNF sorkar inthlahdah vanga tia Congress party-in an puhna chhang letin MNF hian, Zoramthanga sorkar a lo pian khan chief minister hian kawng a ngaih pawimawh em avangin PWD chang nghal chatin, sum tam tak sengin kawng siam hna thawh nghal a nih thu an sawi.
MNF hian khaw kar kawng mai ni loin Aizawl leh khaw hrang hrang khaw chhung kawng pawh a lo tha tak hle laia, Mizoram hmun thenkhatah company thenkhatin kawng laih zauh hna nasa taka an thawk mek avangin, hmun thenkhatah chuan kawng a chhe rih lo thei lo a. Tun hnaia ruah sur nasa avanga kawng khuar thar a awm leh ta leh leiminin kawng a tihchhiat a awm nual tih erawh phat thu a awm lo niin an sawi bawk.
Congress sorkar lai khan Mizoram dung tluan leh khaw chhung kawng zawng zawngte a chhe em em vek tih sawiin MNF hian, “Khaw hrang hrang leh pawl hrang hrangin hnatlangin kawng an siam sup sup a. Sorkar khan zak hauh lovin kutkuang kuahin kawng siama hnatlang mipuite kha a thlir vel mai mai a ni,” an ti.
Congress party thuchhuah anga an sorkar laia kawng siamna tur cheng nuai 8,595.19 an dah laia kawng siam nan sum nei tun chunga kawng an siam thei lo leh, sum tam tak a tul em emnaah pawh hman theiha buatsaih thei lo khatih laia finance minister, tuna MPCC president hi an tih mualphonaah an ngai tih sawiin, “MPCC hian an pu ber mawng sang takah an hlim a ni,” an ti bawk.