India chuan Thawhtanni khan ram a zalen a nih champha vawi 76-na, Independence Day chu ram pumah a lawm a. Prime Minister Narendra Modi chuan Delhi-a a lawmna pui ber, Red Fort-ah Hnam Puanzar pawt pharhin tricolour hian ‘Rashtriya Salute’ a chhang let.
Hnam Puanzar pawh pharh a nih hian zahna laitir nan silai vawi 21 kah chhuah niin 8711 Field Battery (Ceremonial)-a sipaiten an kap a ni.
Ramin zalenna a neih champha kum 75-naah hian tricolour zahna chibai buka silai kah hi a vawi khat nan India siam ngei silai a ni.
Tual chhuak howitzer gun an tih hi Advanced Towed Artillery Gun System niin ‘Make in India’ initiative hnuaia siam a ni a. Ram dang puihna tel miah lova DRDO-in a duan a ni.
A thu sawinaah prime minister chuan ramin kum 75 a tlin niah mipuiten India siam nge ralthuam hmanga Independence Day-a silai hmanga chibai bukna ri an hria tih a sawi nghe nghe.
Prime minister-in Hnam Puanzar a pawh pharh hnuah hian Red Fort chungah MI-17 Helicopter pahnihin Amrit Formation hmanga thlawkin pangpar an thlak.
Prime minister-in tih dan thin pangngai angin thuchah a sawi a. A sawi tawpah National Cadet Corps-in Hnam Hla an sa zui bawk a. Tun tumah hian anganwadi worker, khawlaia inzuara inpho, mudra scheme chhawrtu leh mortuary worker-te sawm an ni.
NCC Special Youth Exchange Programme-ah ram 14 atangin NCC officer 26 leh cadet 127-ten Red Fort-a Independence Day lawmna hi an chhim bawk a. heng ram zingah hian United States, UK, Argentina, Brazil, Fiji , Indonesia, Maldives leh Mauritius pawh an tel.
Red Fort-a zalenna ni lawmna tan a nih hma hian Modi-a chuan Mahatma Gandhi thlan, Rajghat zahna pangpar a dah hmasa bawk.
Thu a sawinaah prime minister chuan he ni hi India-ah chauh lawm ni lovin khawvel hmun tinah lawm a ni a, Tiranga chu zahawm takin hmun tinah tar a nih thu a sawi.
Modi chuan India tana zalenna sualtu - Mahatma Gandhi, Netaji Subhash Chandra Bose, Dr BR Ambedkar leh Vinayak Damodar Savarkar te thawhrimna a fak a. “Zalenna sualtute zahna kan hlan ang hian Azadi Ka Amrit Mahostav-ah an hmathlir kan hriat reng a ngai,” a ti.
Ramin Bhagat Singh, Rajguru, Ramprasad Bismil, Rani Laxmi Bai leh zalenna sualtu dang zawng zawngte a chawimawi tih a sawi a, heng mite hi British Empire sawi nghingtute an nih thu a sawi.
India ram a zalen hnua tuna a nih ang a nih theihna tura bul tantu - Jawaharlal Nehru, Ram Manohar Lohia leh Sardar Vallabhai Patel te pawh zahna a hlan.
India chu thil ngaihtuahtu ropui tak tak - Swami Vivekanand, Sri Aurobindo leh Gurudev Rabindranath Tagore te awmna a nih thu a sawi a. Adivasi freedom fighter - Birsa Munda, Tirot Singh leh Alluri Sitarama Raju te pawhin zalenna a awm theih nan beiin India ram kil berah pawh an nung reng tih a sawi.