Ram pum rualin nimin khan Mizoram hmun hrang hrangah India Independence Day vawi 76-na lawmna neih a ni.
A lawmna pui ber, Aizawl AR Lammualah Chief Minister Zoramthanga’n hnam puanzar a pawt pharh. Chief Minister Zoramthanga hian Mizoram mipuite chibai bukin duhsakna a hlan a. Kumin hi India ramin zalenna a hmuh champha vawi 75-na a nih angin a lawmna Azadi Ka Amrit Mahotsav pualin kawng hrang hranga lawm tih a sawi a. He ‘Year of Amrit Festival of Independence’ hi mipuite thinlungah ram tana inhlan thar lehna thlentu nise a duh tih a sawi a. Hruaitu hmasate inpekna leh India ram tana an inhlanna hlutzia hre rengin, anmahni zahna lantira an hnathawhte chhunzawm turin mipuite chu theihtawp chhuah turin a chah.
Zoramthanga hian hun inher danglam zel hian hriat lawk loh harsatna chi hrang hran a rawn her chhuahpui thin a; Covid-19 hripui kha chutiang harsatna pakhat chu a ni tiin, “Hun khirh leh harsatna karah pawh kan ramin hmasawnna kawng dik a zawh zel theih nan tha thlah lo a theihtawp kan chhuah chhunzawm reng a ngai a. Harsatna karah pawh kan ram tan hma lam hun eng zawk thlirin nghet tak leh huai taka harsatna hmachhawn zel thei tura kan inrin a pawimawh a ni,” a ti.
Mizoram sorkar flagship programme, SEDP chungchang sawiin chief minister hian, he ruahmanna hnuaiah MLA constituency tinah beneficiary 1,500 awmin, beneficiary zawng zawng hi chhungkaw 60,000 an ni dawn tih a sawi a. He scheme hnuaiah hian beneficiary-te chu an eizawnna duhthlanah bul tanna tur Rs. 50,000 pek an nih tur thu leh, a enkawltu department pakuate chu beneficiary an neih zat azirin, he programme kalpui nan hian a vaiin sum Rs. vaibelchhe 328.13 ruahman a nih thu a sawi.
Chief minister hian Lengpui Airport Terminal building sak mek pawh hna zaa 78 thawh zawh tawh niin, airport-a kawng chhawng sak mek chu hna zaa 43 thawh zawh a nih tawh thu a sawi.
Mizoram Police-te thawhrimna zarah kum kal ta chhung khan pawikhawihna lian tham a thleng lo tih sawiin, thubuai (criminal case) theh luh 1,633 zinga 676 chu hlawhlting takin chin fel a ni a, silai tawlh ruk tum mi 20 manin thubuai 12 ziah luh a ni tih a sawi a. Mizoram hi ram nuam leh ralmuang, ram chhuanawm a siam turin inlungruala theihtawp chhuah tur leh, boruak tha lo leh ralmuang lo hnuaiah chuan ramin hma a sawn thei lo tih hre rengin remna leh muanna vawnghim a Mizoram tan theihtawp chhuah zel turin mipuite a chah bawk.
Zoramthanga hian Commonwealth Games 2022 neih zawh takah India ram tana gold medal chawi chhuaktu, Jeremy Lalrinnunga leh bronze medal vaw chhuaktu Lalremsiami te chu a lawmpui tih sawiin, Mizoram sorkar chuan heng infiammi pahnihte hi a theih ang angin chawimawina pek zel a tum thu a sawi.
Aizawl-a Independence Day lawmaah hian parade contingent 28 awmin; armed contingent-ah 2nd BN Assam Rifles chu pakhatna an ni a; Unarmed Contingent-ah 1st MAP Scout & Guide chu pakhatna niin, School Contingent-ah St. Pauls H/S lawmman pakhatna an dawng a, Band party-ah-ah 2nd Assam Rifles Band Party-te pakhat an ni thung.
Chief minister hian sorkar hnathawk mi eng emaw zat hnenah hnathawh that vanga chawimawina a hlan bakah parade contingent-te ti thate hnenah lawmman a sem a ni.Chawimawina
President’s Police Medal for Distinguised Service
1) Lalrinthanga Ralte, Dy. S.P CID (SB) Aizawl
President Fire Service Medal for Distinguished Service, 2021
1) Lalremmawia Station Officer, F&ES
Police Medal for Meritorious Service
1) H.L.Thangzuala, Principal PTS, Thenzawl
2) Inspector Lalrammawia, 3rd Bn. MAP, Mualpui
3) SI (Opr) R.Vanlalruata O/C PR Station, Mamit
Governor’s Gold Medal
1) V.L.Chama Ralte, SI, Khawzawl DEF
2) Reuben Chuautluanga, Constable No.303, 5th IR Bn.
3) J.Laltlanmawia SI, E&N, AC, E&N Champhai District
4) C.V.Lalengmawia Constable No.328 E&N, E&N Station Vairengte, Commissioner, E&N Kolasib Dist.
5) Lalnghahchhana, Constable No.335 E&N, Commissionerate of E&N, Aizawl
Governor’s Silver Medal
1) H.Lalnunmawia, SI, CID Crime
2) Ramnunmawia Fanai, Head Constable(RM) MPRO
3) C.Lalhlimpuia Head Constable, Champhai DEF
4) F.Vanlalvuana Havildar, PTS, Thenzawl
5) C.Zonunthara Havildar, 5th IR Bn.
6) V.Lalhmangaiha, Constable No.91 Traffic Branch
7) C.Zodinpuii SI, E&N, Asst. Commissioner, R&N, Champhai District.
State Awards to Teachers, 2022
1) Joseph Vanlalhruaia Sailo, Lecturer, Synod HSS
2) Lalropuia Chinzah, Teacher, Govt H/S, Siaha
3) F.Lalramliana, Headmaster, Govt. M/S Zawlsei Champhai Dist.
4) P.Lalbiakzuala, Headmaster, Govt. Model P/S Electric Veng Lunglei.
Parade Lawmman dawngtute –
1) Parade Commander – F.Lalhmingliana, Asst. Commandant 3rd BN MAP
2) 2nd Commander – Sarah Lalrinkimi, Dy. S.P (Hqrs) Aizawl
Armed Contingent –
1st Prize – 2nd BN Assam Rifles
2nd Prize – 3rd BN MAP
3rd Prize – 5th IR BN.
Unarmed Contingent –
1st Prize – 1st MAP Scout & Guide
2nd Prize – 20BN Mizoram NCC
3rd Prize – 1st Mizo Air Squadron NCC
School Contingent –
1st Prize – St. Pauls H/S
2nd Prize – Synod H/S
3rd Prize – Govt. Mizo HSS
Band Parties –
1) 2nd Assam Rifles Band Party
2) 1st BN MAP Brass Band Party
3) 3rd BN MAP