Patrol laia vur tawlh thutin a hnawl avanga kum 38 zet kal taa Indian sipai bo ruang chu Siachen-a bunker hluiah hmuh a ni.
Sainik Group Centre, Ranikhet chuan Pathianni khan an ruang chhar hi 19 Kumaon Regiment-a mi, Chandrashekhar Harbola ngei a ni tih an finfiah a ni.
Harbola-a hi kum 1984 khan khawvela indona hmun sang ber, Siachen-ah hian Pakistan dova ‘Operation Meghdoot’-a tel mi 20 zinga mi a ni.
An patrolling laiin vur thlipuiin a nuai a, sipai 15 ruang chu hmuh a ni a, mi dang panga erawh hmuh an ni ta lo va, Harbola pawh hi hmuh ve loh zinga mi a ni.
A nupui, Almora-a cheng thin, Shanti Devi chu tunah chuan Delhi-a Saraswati Vihar Colony-ah a cheng tawh a. A ruang hi Thawhtanni zan khan an hlan.
Haldwani Sub-Collector Manish Kumar leh Tehsildar Sanjay Kumar chuan Harbola chenna hi tlawh hmasain a ruang thlahna hnuhnung hi sipai chawimawina famkim nen neih a ni ang.
Devi-i chuan a pasal nen hian kum kua an innei hman a, a thihsan lai hian kum 28 mi a ni a. An fanu upa ber chu kum li niin a naupang zawk chu kum khat leh chanve a ni tih a sawi.
Harbola hi January, 1984 kha a haw hnuhnung ber niin a kal leh dawnah pawh haw leh thuai turin a insawi tih a sawi a. A pasal chu a chhuangin a chhungte aia ram tana inpek thlang tura a intiamna a tihlawhtling niin a sawi.
Harbola hi Dwarahat, Almora-a cheng niin sipaiah hian kum 1975 khan a lut a ni.
A ruang an hmuhna hmunah hian sipai dang ruang pawh an hmu nia sawi a ni a; mahse, tunge a nih erawh an la hre thei lo.