India-in a zalenna champha vawi 76-na a lawmnaa thil langsar tak, uar taka Hnam Puanzar zar chuan a awh thui hle a. Thawhtanniah khan internet khawvelah zarna hmun danglam tak tak hmuh tur a tam hle a, tlangah te, tui hnuaiah leh van thengrengah thleng tricolour hmuh tur a awm.
Indo-Tibetan Border Police (ITBP) chuan Ladakh-ah tricolour an zar a. Union territory hi India leh China intihbuai fona hmun a ni a. Sipaite hian Mission Amritarohan tia a hming vuahin tlang sang hmun 75 laiah Hnam Puanzar hi an zar a ni.
ITBP hian Himachal Pradesh-ah pawh tricolour hi feet 17,000-a sangah an zar a. Hmun hrang hrangah flag rally an huaihawt bawk.
Indian Coast Guard pawhin tui chhungah tricolour an pawt pharh a. Twitter-a video an tihchhuahah flag demo chu Andaman & Nicobar Island bula tuipui chhungah an pawt pharh a. Hei hi ‘Har Ghar Tiranga' campaign puala an tih a ni.
Tricolour hi khawvel piah lamah pawh zar a ni a, aerospace organisation Space Kids India-in video a tihchhuahah van sang km 30 velah India Hnam Puanzar zar a ni a. NASA astronaut Raja Chari pawhin International Space Station-a Indian tricolour zar thlalak a pho chhuak bawk.
Khawvela indona hmun sang ber, Siachen-ah pawh tlangsanga awm sipaite chuan Independence Day pualin Hnam Puanzar an lo zar ve bawk.