Kum 2022-a Gujarat riots tia an sawi, Muslim-te laka Hindu-te nasa taka an chetnaa thil thleng, hmeichhia pawngsual rawn leh tualthah thubuaia dam chhunga tang tura hrem mi 11-te chu chhuah an ni tih Indian chanchinbute chuan an tar lang a, he thil hian sawi leh dem a hlawh hle.
Bilkis Bano case tia an sawi maia thiam loh changte hi Thawhtanni khan Gujarat-a Godhra khuaa an tanna atangin state sorkar hnenah hremna an pek chu sut (remission) tura an ngenna hlawhtlingin chhuah an ni.
Kum 2002-a Hindu biakzin eng emaw zat chianna rel kangah mi 59 lai an thihna chu Hindu la run pawlte chuan tual chhunga Muslim-te tihah an puh.
Muslim-te laka an lungawi lohna chu tharum thawhnain an lantir a, ni eng emaw zat buaina chhuakah mi 2,000 dawn an thi a. A tam ber hi Muslim niin sawisak hlum, kah hlum leh hal hlumte an ni a. India-a state hausa bera thil thlengah hian hmeichhe tam tak pawngsual an ni bawk.
Hetih hun lai hi tuna prime minister ni mek, Narendra Modi-a chief minister a nih lai a ni a. Tharum thawhna titawp tura hma a lak dan leh mihring dikna chanvo humhalhtute laka chet dan thlengte tihtawp tum lova puhna thawm a nasain dem a hlawh hle.Bilkis Bano case
Muslim laka tharum thawhna thleng zinga langsar ber ni zui ta chu Bilkis Bano-i pawngsual rawn leh a fanu kum thum mi, Saleha thah kha a ni a. March 3, 2002 khan Dahod district-a Limkheda-ah an nufa hian an laka tharum thawhna rapthlak tak hi an tawng a ni.
Saleha-i hi leiah a lu na taka vuak vangin a thi niin court thuremnaah tar lan a ni a. Hetih lai hian Bano-i hi kum 21 chauh niin thla nga mi nau a pai mek bawk a. Hriatna hlohvin thi anga kalsan a ni a, a dam chhuak ta hlauh a ni.
Pawngsual rawntu mipa 11-te hi Bano-i hian an thenawm hnaia mite vek niin a hnuah a sawi.
Gujarat-a sorkar hotu lian pakhat, Raj Kumar chuan The Indian Express chanchinbu hnenah hremna sut tura mi 11-ten an ngen chhan hi ‘kum 14 an tan tlin tawh vang’ niin Thawhtanni khan a sawi a. India-ah hian ‘dam chhung lung in tan’ hi a tlangpuiin kum 14 a ni.
Supreme Court chuan thubuai kha sorkar laipui hnuaia CBI chhui turin a ti a. Kum 2004 khan Bilkis chhungkua hian thil tisuala puhten thah tuma an vau nia a sawi avangin court sang ber hian thubuai ngaihtuahna chu Gujarat atangin Maharashtra-ah a sawi bawk.
Special CBI court chuan kum 2008 khan mi 13 thiam loh a chantir a, an zinga mi 11 chu mi pawngsual rawn leh thah vangin dam chhung tang turin a ti a ni.
Kum 17 zet a beih hnuah Supreme Court chuan kum 2019 khan Bilkis-i hnenah hian zangnadawmna Rs. maktaduai nga pe turin thu a titlu a, hetianga tih hi Gujarat riots case-a a hmasa ber a ni nghe nghe.Demnna thu
All India Progressive Women’s Association (AIPWA) chuan Gujarat-in hremna a sut ta mai chu an dem hle a. Pawngsualtute zalentir an ni chuan mipa dangte lakah huangtauna a thlen thei niin an sawi.
“Prime Minister Modi leh Home Minister Amit Shah hian he thutlukna hian eng nge an sawi dawn? BJP-a hruaitu lawk ber ber pahnihte thu hmu lo hian he thutlukna hi an siam lo vang tih kan rinna hi a dik dawn em?” an ti.
New Delhi-a dan hre mi hriat hlawh tak, Mehmood Pracha pawhin pawikhawihtuteah khan rorel lai, BJP an inrawlh ngei tih a lanna niin a sawi.
Gujarat riots kha BJP hotu liante atanga chhuak niin dan bawhchhiate pawh tun thlengin an la chhan niin a sawi.