Pakistan chhim lama bus-in tuialhthei phur (tanker) a sutna leh a hnua kangmei chhuak zui taah mi 20 vel an thi.
Punjab province-a chhiatna hi Thawhlehni zing khaw var hmaa thleng niin mihring phur bus hian a hnung lamah tanker chu na takin a su niin thuneitute chuan an sawi.
Bus-ah hian passenger 24 bakah thawktu pahnih an chuang a, Lahore atanga Karachi pan an ni a. Police chuan tanker khalhtu hi a tlan bo zui niin an sawi.
Ruang thenkhat chu an kan nasat em avangin tute nge an nih hriat mai theih pawh an ni lo tih thuneitute chuan an sawi a, DNA test hmanga chhui ngai an nih hlawm dawn thu an sawi.
Hliam tuar mi parukte pawh an na hle a, Multan khawpuia Nishtar Hospital-ah hruai an ni tawh tih thuneituten an sawi.
Investigating officer Kashif Shahzad chuan he thil thleng chungchangah hian police-in FIR an ziah luh tawh thu a sawi.
“Bus khalhtu pawh hi a thih ve avangin thil chhui buaithlak tak a ni thei,” a ti.
National Highways & Motorway Police thupuangtu, Asad Shabbir chuan tanker hian tuialhthei litre sang chuang a phur tih a sawi.
“An insut hnua kangmei chhuak hi a nasa hle a, chhanchhuah hna thawktute tan pawh thi leh hliam tuarte lak chhuah mai ngaihna a awm lo,” a ti.
Chhiatna thleng avang hian helai kawng hi rei vak lo khar a nih phah nghe nghe.
Pakistan Prime Minister Shehbaz Sharif chuan chhiatna thlenga thite a sun thu Twitter-ah a tar lang a. “Chhiatna thlengah nunna hlu tak 20 chân a ni a. An chhhungte ka tawngtaipui reng a ni,” a ti.
Punjab province Chief Minister Parvez Elahi pawhin pawi a tih thu sawiin thuneitute chu a theih anga puihna pe nghal turin a ti.