Khawvel football thuneitu sang FIFA chuan India rama football thuneitu All India Football Federation chu tiamchin awm lova a hrem lailawkna a tichhuak.
FIFA chuan, “FIFA Council chuan AIFF inkaihhruainaah a dan in a huam loh anga pawn lam atanga inrawlh an awm avangin he thutlukna hi a siam.” tiin an hrem chhan an sawifiah a. He hremna hi Supreme Court in AIFF Executive Committee thuneihna lo la lailawk tura Committee of Administrators a ruat chu thiah a nih a, AIFF inrelbawlna pangngai kalpui a nih leh theih hunah hlih a nih tur thu an sawi nghal.Eng nge a chhan?
Indian football in buaina a tawh chhan ber hi hruaitu thar thlan chungchangah a ni a. President hnuhnung ber Praful Patel chuan kum li chhung daih term chu vawi thum a hmang zo tawh a, National Sports Code danah a chuh thei tawh lo.
AIFF hi inthlang tur an nihlaiin a hun tihkhawtlai zel a nih avangin May 18 khan Supreme Court a inrawlh ta a. AIFF Executive Committee thuneihna la tur CoA chu a din ta a ni.
CoA hian inthlan buatsaih a, constitution thar duang a, FIFA leh Asian Football Confederation hmaah a rang thei ang ber a pawmpui tura kal tir tur an ni a. Heta tang hian buaina a kal chho tan.
CoA hian AIFF chhehvel ami leh sa 12 telna advisory council a din a, hei hi FIFA in pawn lam mi a phal lohna dan kalh tlat a nih avangin paih a ni nghal.
Neuh neuh dang awm zelin inthlan a khawtlai zel a, tunhnaiah Praful Patel a inrawlh leh tan niin sawi thawm a awm leh bawk. FIFA chuan India dinhmun hi thlir rengin thutlukna a siam zui ta a ni.Eng nge a nghawng dawn?
He hremna hian India rama football-ah nghawng a nei nual dawn a, chumi zinga langsar leh pawi ber tur chu kumin October a 2022 U17 Women's World Cup a thlen tur a ni.
October 11 a tan tur tournament hi an buaina chinfel a nih thuai loh chuan sawn theih a ni a, FIFA in hemi chungchang hi a ngaihtuah nawn leh dawn. Buaina hi chinfel a nih vat erawh chuan India hian a la thleng tho thei bawk.
Hei bakah hian India in FIFA emaw AFC hnuai tournament-ah hrem an nih chhungin engmawh an khel thei dawn lova. Indian football club-te pawhin AFC hnuaia inelna awmte an khel thei rih lovang.
Hrem an nih chhung hian India chuan FIFA emaw AFC hnen atangin sum lama puihna engmah a dawng thei dawn lo bawk.
Hetihlai hian FIFA in a chungah hremna kengkawh mahse tualchhung football inelna erawh kalpui theih a la ni thova. Indian Super League leh I-League te a pangngai anga kalpui reng theih a ni a. Mahse heng club-te hian FC Champions League emaw AFC Cup an khel thei dawn lo tihna a ni.