Vairengte – Sairang NH 6 & 306 4-Land Owners Association-in zangnadawmnaa an harsatnate chin felsak phutin nimin khan Kolasib Press Club atanga Kolasib DFO pisa thleng kawng zawh an huaihawt.
Kawngzawh an huaihawt hma hian Land Owners Association hruaituten Kolasib Press Club-ah thu thar thehdarhtute kawmin an chairman, James Vanlalringa chuan NHIDCL-in Vairengte-Sairang NH 6 & 306 a laih turah MoRTH-in a ruat angin Competent Authority of Land Acquisition (CALA)-in 3A notification a chhuah tih a sawi a. Kawng zauhna tur atana ram nei zawng zawng, sorkar pass leh VC pass neite tar lan a nih thu leh sawisel duh nei tan hun hawn a nih hnuah a nih thu a sawiin, “Sawisel duh nei tan hun hawn a nih hnuah 3D notification chhuah leh a ni a, hemi hnuah CALA thuchhuak angin kawngin a paltlang turte ram endik a ni,” a ti.
Lungawi lohna leh sawi duh nei tana hun hawn a nih chhungin ram neitu leh Mizoram sorkar atangin sawiselna engmah a awm loh hnuah, CALA chuan 3G turin ruahmanna a siamin, package indawtin NHIFDCL-ah 3G pawmpuina dil a nih thu sawiin, “Zangnadawmna peih fel a nih tawh aiin, tlai khaw hnuah forest department-in harsatna an siam ta a ni,” James Vanlalringa’n a ti.
Land Owners chairman chuan forest reserved tihah hian forest deartment chuan town vllage a puang vek tawh tih sawiin, sorkar hmunhma tam tak, Kolasib DFO pisa ngei pawh forest reserved chhungah a awm tih a sawi a. Forest department dan tan chhan chu sorkarin ngaihtuah chiang a, dan hlui tawh hi siam that emaw, cancel emaw a tul tawha an ngaih thu a sawi bawk.
July 7, 2022 khan Land Owners hruaitute hian chief minister hnenah an harsatnate ziakin an thlen tih sawiin James Vanlalringa chuan, “Forest minister pawh tum hnih kan hmuh tawh a. Revenue department chuan CALA hnenah chief minister-in ti tura a tih angin zangnadawmna pe chhuak turin an hriattir,” tia sawiin, Kolasib DFO chuan ram lak chungchangah NHIDCL objection a pek vangin harsatna an tawk ta tih a sawi bawk.
Land Owners hruaitute chuan Mizoram sorkarin a rang lama an harsatnate chin felsak tura an phut tih sawiin, chief minister bakah Kolasib district chhunga MLA-te pawh an harsatnate chin felsak thuai an phut thu an sawi bawk.
Thu thar thehdarhtute zawhna chhangin Land Owners hruaitute chuan, “Forest clearance an phut rual hian compensatory afforestation then mai sela, leilung hlutna kha tuna revenue pass nei lo leh VC pass nei lo a tam zawk a nih si avangin, kan ram hlutna kha court-a thlen tura kan tih kha tunah hian forest department hian min thlen khalh a. Tuna ram neitu kum 30/40 chuang kan lo enkawl tawh hi, a ram hlutna chân thei dinhmuna kan ding hi a lungngaih thlak a ni,” an ti.
James Vanlalringa sawi danin forest department-in tuna an ram nia an chhal chhunga mi mal ram tam tak awmin, ram neitu chhungkaw 1,751 chuang an awm mek a. Forest department tan chhan, Mizoram District Council (Forest Act) 1955/1965 hi dan hlui tawh leh tan chhan tlak tawh loh a ni a. He dan hi April 12, 2021 khan Guwahati High Court, Aizawl Bench chuan a lo nuai bo tawh bawk a ni.
Thu thar theh darhtu an kawm zawh hian Kolasib Press Club atangin Kolasib DFO pisa thleng Land Owners member-te hian kawng zawhin, an pawl hruaitute hian DFO chu a pisaah an kawm nghal a. DFO hnenah hian zangnadawmna an dawn tura harsatna awmte chin felsak turin an ngen a. DFO pawhin an thu thlente chu GAD thutkhawm neih hunah a lo thlen tur thu a lo hrilh.Vairengte – Sairang NH 6 & 306 Land Owner’s Association Joint Resolution
- MoRTH hnuaia NHIDCL ten 4-Lane kawngpui zau tha tak an sial turah an hmalakna tithuanawp zawnga EF&CC ten tun hnaia reserved forest tia ram zau tak an rawn hauh avanga harsatna awm mek hi kan sorkar hian ching fel vat rawh se.
- Mizoram District Council Act 1956 hi mipui tana tangkai tawh lo leh hnawk sak mai a ni a; he dan hi paih/nuaibo anih theih nan kan sorkar a roreltute hian chak takin hma la rawh se.
- 4-lane kawngpui laih hna hi tan a nih vat theih nan mipui zangnadawmna pawisa CALA account-a awm mek hi land owners-te hnenah a rang thei ang berin a pung (interest) nen min pe chhuak vat rawh se.
- Land Owners-te huan thlai hlutna leh ram leilung hlutna CALA-in min chhut chhuahsak (3G Estimate) ang hian min pe ngei rawh se.
- 4-lane kawngpui sial tur avanga sorkarin kum hnih chuang kan huan lo rama hma la thei loa min siam tawh hnuah, tun thlenga zangnadawmna pawisa sem thei loa forest-in harsatna min siam hi kan hrethiam lo a, hei hi Land Owners-te rahbehna leh in tihkhawtlai tumnaah kan ngai.
- EF&CC ten tun hnaia NHIDCL-ah forest clearance an demand ruala mi mal ram chhunga Compensatory Afforestation (CA) leh Present Net Value (PNV) an rawn claim tel ta mai hi Land Owners-te tham lohna leh mipui sum dik lo taka laksak tumnaah kan ngai.
- Ram lak chungchangah Mizoram sorkar leh CALA ten dan angin notification an chhuah a, heng notification ah hian forest department lam atangin complaint emaw, sawi buaina engmah CALA-in a dawng lo a. Tunah 3G (Award list) hial chhuah hnu leh zangnadawmna pawisa pawh CALA account-a thun a nih vek tawh hnuah an rawn sawi buai leh si hi Land Owners-ten kan hrethiam lo tak zet a ni.