August 2,2022 zana car nena Sihhmui/Lengte kai, Leidawh bula chesuala luia tla, Malsawmkima, kum 10 ruang chu nimin khan Tlawng, Changsil kaiah hmuh a ni a, vui liam nghal a ni.
Tar lan tawh thin angin August 2 zan dar 6:30 khan Sihhmui/Lengte kai, Leidawh bulah car a chesual a, car-ah hian mi pali chuangin an zinga mi pahnih - C Lalfakzuala leh a fapa, Malsawmkima te chu luiah tlain an awmna chin hriat a ni ta lo a ni.
An chetsualna atanga ni 17 a liam hnuah nimin zing dar 10 bawr vel khan Buichali lei bula hnam dang awmten tuia ruang lâng an hmu a, Sairang police, Sairang leh Sihmui YMA te hriattir an nih hnuah mi tlawmngaiten ruang hmuhna hmun, Buichali lei lam an pan nghal.
Tlawnga ruang lang hi huan kal tur mi thenkhatten hmun hnihah an châng tawh a, an lo man hman lo a, hemi hnu hian Changsil kai lamah an tlan khalh a, reilo teah tuiin a len hmuin, Sairang YMA member, Lalrinsanga (Tea) leh F. Zonunsanga, Sairang Dinthar YMA Secretary ten tui tam tak karah an hnuk chhuak a ni.
Ruang hi Sairang Dinthar YMA Hall-ah lak niin, YMA lam buatsaihin thlahna hun hman a ni a, Sairang Dinthar YMA-ten kuang an siamsak a, hemi hnuah Sairang PHC-ah postmortem leh niin, nimin chawhnu khan an chenna in thlenpui a ni a; tlai dar 4 khan vui liam a ni.
Nimin zing dar 10 bawr vela Malsawmkima ruang hmuh a nih hnu lawk khan mihring ruang luia lang chu hmuh a ni ve leh a, Sairang Dinthar Branch YMA-ten ruang lang chu zawng zui nghal mah se he thu buatsaih lai thleng hian C Lalfakzuala ruang nia ngaih chu hmuh zui a la ni leh ta lo a ni.