Union Minister Nitin Gadkari chu BJP party-a thutlukna siam thei sang ber atangin paih a ni a, Devendra Fadnavis leh BS Yediyurappa te an tel thar thung.
Uttar Pradesh-a record siama BJP tlinpuitu, Chief Minister Yogi Adityanath pawh party chhung insiksawia committee sanga tel lo langsar zual leh mak tih hlawh a ni.
Karnataka chief minister hlui, Yediyurappa hi an party parliamentary board-a mi thar pali lang zingah a tel thung.
Parliamentary board hi BJP-a thuneitu sang ber niin chief minister, state-a an party chief leh chanvo pawimawh zawng zawng khawihtu an ni.
Yediyurappa hi nikum khan ei rua puhna a awm avangin an state chief minister a nihna atanga chawlhtir a ni a, hei hi tihluihna ang deuhva ngaih theih turin a awm a. Hetih rual hian tunah Kum 77 a ni tawh a, an party-in ziak loh dan an neih, ‘chanvo pawimawh bik chelh tura kum 75 aia upa lo’ an tih chu a pel tawh hrim hrim a. An chawlhtir danah hian thawkkhat lai khan a lawm vak lo tih sawi pawh a awm deuh hman a; mahse, party hian chelh an duh.
Committee pawimawha Gadkari-a a tel lo hian mak tih a hlawh ber a. Prime Minister Narendra Modi-a sorkara minister hlun ber pakhat, an party chief hlui ni bawk a ni a, an tih dan phungah parliamentary board-ah hian president lo ni tawhte hi an tel ziah thin a ni.
Madhya Pradesh Chief Minister Shivraj Singh Chouhan pawh a tel sa atanga paih a ni a. Ani pawh kum 20 zet chief minister ni thei a nih avangin telh loh a ni hian mak tih a hlawh.
BJP chief hlui, Union Defence Minister Rajnath Singh erawh parliamentary board-ah hian telh thar leh a ni bawk.
Assam chief minister hlui, Sarbananda Sonowal pawh parliamentary board bakah Central Election Committee-ah a tel thar bawk a. Ani hi nikum khan Himanta Biswa Sarma kianin an state-ah chief minister nihtir a i zawk a, amah hi union minister nih zuitir niin tunah rorelna sangah telh a ni leh ta bawk.
Fadnavis-a pawh election committee-ah telh thar a ni a, ani hi Maharashtra-ah BJP-in Shiv Sena atanga hel, Eknath Shinde-a hova sorkar an siam theih nana pawimawh tak niin chief minister thin leh hual leh lai ni mah se deputy chief minister-ah a inhnuk hniam.
Parliamentary board leh election committee siksawiah hian khawih danglam ve loh pathum - Prime Minister Modi, Amit Shah leh party chief JP Nadda te chiah an awm.