Jal Jeevan Mission hnuaia in tina tui connection pekna tur functional household tap connection (FHTC) atangin Champhai district-a in 18373-ah in 12207 ah tui connection pek tawh an ni.
Champhai district water & sanitation mission (DWSM) thutkhawm nimina neihah tarlan a nih danin, tui connection pek hmabak in 6166 la awm zinga a chanve aia tamah tui connection peka herhhaw tawh ni mahse, JMM inkaihhruainain mi pakhat zel tan nitin tui litre 55 pek ngai zat a la tlin chiah loh avangin FHTC hnuaiah ziahluh a la ni lo a. Khaw 12-ah FHTC zawh fel tawh niin, khaw dang 30-ah hmalak mek a ni.
Swachh Bharat Mission (Gramin) 2022-2023 hnuaia hmalak mekna zingah PHED leh LAD 15th Finance commission tangkawp kaltlangin Community compost pit 87 leh Community soak pit 18 te siam mek a ni bawk.
DWSM Executive vice-chairman, SE, PHED Champhai WATSAN Circle C. Lalhmachhuana’n kum 2014 atanga kalpui tan, Swachh Bharat Mission (Gramin) kaltlangin Champhai district chu kum 2016-ah pawn leh dai vela inthiar thin awm tawhlohna -Open defecation free (ODF)- district-a puan a nih thu leh ODF Plus ni tura tanlak zui nghal a nih thu a sawi.
DWSM Chairman, Champhai Bawrhsap James Lalrinchhana’n district hmasawn, fai leh changkang ni turin tui thianghlim hnianghnar taka neih a pawimawh thu a sawi a. Tuilakna siam, enkawl zui bakah hmachhawp awmte tha taka hlenchhuah a nih theihna tura tanlak a tul thu a sawi. DWSM member-te chu thingtlanga cheng ten tui thianghlim hnianghnar taka an neih theihna tura an tawnhriatte tangkai taka hmang tura chahin, inpawhtlang taka thawhhopuiah a sawm bawk.