Spain khawchhak lam, Valencia khawpui hmarthlang lama ram kangin rel tlan lai a man kai a, a chuang zinga insaseng tum mi 10-in hliam an tuar a, an zinga pathum chu an na hle nghe nghe.
Bejís bula ram kang hi thli na tak thawin a timankai chak zual a, a thelh hna thawk mekte pawhin an insasengsan hial a ngai.
Valencia leh Zaragoza inkara tlan rel hi a man a, rel dang tlan turte chu tihdin rih a ni.
Rel khalhtu chuan mipuite chu pawn chhuak lo turin a ti a; mahse, thenkhat chiai zual chu insaseng an tum lui a ni.
Thawhlehni tlaia thil thlengah hian a khalhtuin rel hi hnung zawnga kaltir a tum mek laiin a chuang mi 48 zinga thenkhatin tukverh darthlalang tikehin an chhuak a, mei an hnaih lehzual sauh zawk chu hliam an tuar ta nual a ni.
An zinga thenkhat hi an kang a, pakhat chu thlawhna hmangin Valencia-ah phurh a ngai a. A kang na zual pahnih dang hi hmeichhia kum 58 mi leh hmeichhe naupang kum 15 mi an ni.
Rel chhuahsan lote erawh tumah na an awm lo.
Social media-ah ram kangin rel a pan mek lai leh a bul lawka a kang laite chu nasa taka thehdarh a ni.
Rel khalhtu hian rel hi station hnai ber, Caudiel-ah a kirpui leh a. Rel chhuahsantute pawh an phur let leh nghal vek bawk.
Bejís leh a chhehvel khuaah hian ram kang avangin mi 2,000 chuang hmun hima suan chhuah an ni tawh.
Castellón fire brigade chuan kangthelhtuten metre tam taka sanga kang inhlap an tlanchhiat laite an tilang a, thli hawi dan inthlak thut avangin an nunna atan hlauhawm khawp a ni.
“Tlan r’u, tlan r’u!” tia inau thawmte pawh hriat tur a awm.
Kangthelhtute chuan ram hectare 6,000 vel a kan chhiat tawh an rin thu an sawi.