- LALNUNMAWIA PACHUAU
Khawvelah hian sual leh tha hi a indo reng a, sualin hnehna a chan hun a herchhuak cháwk thin. Khawvel hian he hun thim hi a lo hmachhawn fo tawh thin a, ram tamtak chuan hun harsa leh khirh tak tak lo hmachhawn tawhin Revolution te hial a lo chhuak tawh a, ngaihdan leh pawm dan inan loh vangin tualchhung indona (Civil war) thlengin ram ropui America te pawhin an lo hmachhawn tawh a, thisen a lo luang nasa tawh hle thin. He hun thim hnuaiah hian ram politics kal dik loh vangin hringnun hlu tak chu vuiliamin a lo awm tawh thin a, mahni mihring pui te suata thisen tam tak luan tir hun te pawh a lo inherchhuak tawh thin.
Khawvel ram hrang hrang inawp dan danglam tak tak karah ram inrelbawl dan kalphung inan lohna vangin khawvel hian cold war te pawh a lo hmachhawn tawh a. Hetih lai karah hian dictator te, terrorist te, etc., ten ram thenkhat an lo awp mek bawk. Mahni ngaihdan leh duhdan pawh puan chhuah theih lohna rorelna hnuaiah mi tamtakin hringnun an vuiliam mêk a, zalenna rahbehna leh mihring nun hlutna hnualsuatna hun thim hi he khawvel mihring te hian tun khawvelah pawh hian an la hmachhawn mêk chu a nih hi!
HRINGNUN PHUARKHAWMTU POLITICS: Ram rorelna kalphung political system hian kan nun pum hi min nghawng vek tih hi mi tamtak chuan kan hrethiam kher lo ang. Ram hruaitu pakhatin, “Politics ngaihtuah lo chuan a mah a inngaihtuah lo a ni” a lo tih khan a hrilthui hle mai. Ram hruaitu te rorelna kalphung dik leh dik loh vangin kan hringnun damchhung tâwite hi kan hman dan a danglam dawrh thei tih hi khawvel ram hrang hrang kalphung hian a hrilchiang hle awm e. Ram hmangaihtu te hruaina hnuaiah mipui ten intodelh takin, zalen leh thlamuang takin an hringnun an vuiliam a, ram hruaitu lalhrawt ching leh pamham te hruaina hnuaiah mipui te an rûm thin a, rethei tlawk tlawkin hringnun an vuiliam thin.
Irish Philosopher Edmund Barke chuan, “The only thing necessary for the triumph of evil is for good man to do nothing” tiin thil sual leh thalo dinchanna tura thil pawimawh ber pakhat chu mitha te engmah ti lova awm tir leh ngawih tir hi a ni tiin a lo sawi diam tawh a. French ram rorelna, nuam tinreng tawla lal an hrawt lai khan an ram mitha leh philosopher, Voltaire te, Jean Jacques Rousseau te leh Montesquieu te khan thudik hmangin mipui mit kha lo tivar lo se revolution kha chhuakin reformation kha a thleng kher ang em? Mipui te mit tivara thiltha leh tha lo thliar hrang tura lo auchhuak thin mitha te hi ram tin hian an kawl vek a, he’ng mi te pênchhuahna hmunah hian mipui ten kawngdik an lo zawh tawh thin.
Politics hian kan nun zawng zawng min phuar khawm vek a ni tih hrethiam pha lo hi mipuitling tak tak zingah hian an awm nawk ang. Luhchilh tlaka an ngaih loh vang te pawh a ni mahna le. Mahni ngaihdan diktak leh duhdan puangchhuak ngam lo leh pênchhuah pui ngam lo te hi mi pamham te lalhrawtna hnuaiah an kûn thin. Naupang tea USA President ni ta, Barak Obama khan an ram thalai te chu ram rorelna siamtha turin a pawn atang ni lova a chhunga luhchilh turin a lo fuih mawlh mawlh tawh thin.
AWN LAM NEI LO NEUTRAL-TE: Greek Philosopher Plato khan “One of the penalties for refusing to participate in politics is that you end up being governed by your inferiors” tiin ram rorelna huangchhungah mitha te inbarh lut ve turin a lo ngênngáwl hle tawh a. America President Wooddrow Wilson chuan, “Neutrality is a negative word. It does not express what America ought to feel. We are not trying to preserve the foundations on which peace may be rebuilt” tiin ramin harsatna a tawh laia ngaihdan pawh sawi ngam lo, neutrality mindset nei te a demna thu an lo chhakchhuak tawh bawk.
Hetih lai hian American writer leh Nobel laureate Elie Wiesel chuan, “We must take sides. Neutrality helps the oppressor, never the victim. Silence encourages the tormentor, never the tormented” tiin kan ngawih reng vanga a tuartu kan nih theih zia hi khawvel hian min lo hriattir fo tawh thin. A duhthawh deuh Italian moral philosopher Dante Alighieri phei chuan, “The darkest place in the hell are reserved for those who maintain their neutrality in times of moral crisis” tiin ramin harsatna a tawh lai pawha ngawih chuh reng te hi hremhmun thim lai ber chang turin a lo ruat hmak bawk.
NGAWIH HI FINNA?: Ram hrang hrang hruaitu te ngaihdan leh pawm dan a inan miau loh vangin an rorelna kalphung pawh a in anglo zut a. Hrin hran kan nih angin kan ngaihdan leh duhdan a hrang hlak bawk. Lal Solomon-a’n “Mi â ber pawh a ngawih reng chuan mifing a ni mai” a tih hi ram inrelbawlna huangchhungah erawh chángchàwi chi a ni ber lo mai thei. German Philosopher Friedrich Nietzsche chuan, “Silence is worse; all thruths that are kept silent become poisonous” tiin ngawih reng leh thudik puanchhuah ngam lohna hi tûr hlauhawm tak a chan theihzia a lo phochhuak ve thung.
Dr. Martin Luther King Jr khan, “In the end, we will remember not the words of our enemies, but the silence of our friends” tiin an hmelma te lawmna aw thangkhawk aiin an thian ten an ngawihsanna chuan a thinlung a tihnatzia a lo tlangaupui hial tawh a. A mah Martin Luther King Jr vêk chuan heti hian a han thual leh nghal zat a, “A man dies when he refuses to stand up for that which is right. A man dies when he refuses to stand up for justice. A man dies when he refuses to take a stand for that which is true” tiin..
Kan hriat theuh angin kan ram kalphung hi mipui rorelna Democracy a nih angin kan sawrkar hi kan tana kan siam leh kan ta a ni. Abraham Lincoln-an, “Government of the people, by the people, for the people, shall not perish from the Earth” a lo ti mathlawn lovin he kan ram sawrkar pawh hi Political Party bil sawrkar ni lovin a ram mipui te ta a ni tih hi kan hriat thar fo a ngai. Khawi ramah mah roreltu te lalhrawtna, inchhekarbawmna leh inhaivurna hian rah/ha a chhuah ngai lo a, ram mipui hian an tuar zawk thin a ni tih hi he khawvel hian min lo hmuh tir fo tawh! Duhtawka lalhrawta mahni hlawh phû hauh loa ram hruaitu te inchhekarbawmna leh in ropui an din ulh ulhna ramah mipui ten rethei tak leh beidawng takin an hringnun an vuiliam thin. He hun thim hi kan ram hian kan hmachhawn ve mêk a ni lo’m ni?
Mitha ten ngawih an chuhna leh an pênchhuah duh lohna ram apiangah mi awkhrawl leh pamham ten rorelna huangchhungah duhtawkin lal hrawtin an inhaivûr thin a, thiltha ti tura an pênchhuah ngam loh vanga an dawihzepna chuan an lu chungah meiling chhêkkhawl tirin mi pamham te bâwihah an tlu lut thin a, talchhuah an tum ve meuh chuan phéngphehlepa khua a tlai tawh thin. Tun dinhmuna kan ramin a tawn mék pawh hi ngaihtuah ila, mitha leh midik te aia sum ngah ngah hmelthatna hun lo thleng chho hi a ni. Politics huangchhungah sum ngah ngah an lut thûk a, an sum lakluhna bulfûk hriattur awm loa hausa tak tak ten he kan ram rorelna hi a thunun chho a nih chuan kan chan tur chu a nasa lo khawp ang.
Khawvel mihring te tan hian vawi khat chauh pian hun ruat a ni a, thih hun ruat a ni bawk. Tu’mah piang nawn tur kan awm lo a, thlarau khawvel ata he leia lo kir leh ta hi kan la awm lo chu a nih hi. Kan hun tawn mek leh kan khawvel kalphung hmu thiam pha reng chunga auchuak ngam lo, pênchhuak ngam lova ngawi renga ram hruaitu te lalhrawt leh inhaivur kan uipui tuilian thlir reng a nih chuan keinin tuar lo mah ila, kan tu leh fa te tan he saltanna atanga talchhuah hi a har talh tawh ang. Theihtawpa hna kan thawk chunga kan retheihna te leh harsatna bawih ata talchhuak thei lova kan awm hi kan kan chantawka khuarèl a ni bik rêng nge, kan hruaitu te ram hruai dan dik loh vang tih hi zawhna pawimawh tak a ni e.