Aizawl: State Medicinal Plants Board (SMPB) Mizoram, Directorate of Ayush leh College of Veterinary Sciences & Animal Husbandry, Selesih tangkawp buatsaihin nimin khan Azadi ka Amrit Mahotsav hnuaia hmalakna peng pakhat, mi tinin ramhmul damdawi awlsam taka an neih theih nana an kawtkaia chhawpchhuahsak, ‘Ayush Aapke Dwar’ chu Selesiha Veterinary Sciences & Animal Husbandry College-ah neih a ni a. Environment Forests & Climate Change Minister TJ Lalnuntluanga chu khuallian a ni.
TJ Lalnuntluanga chuan, “Mizoram chhunga ramngawah ramhmul damdawi a tam hle a, EF&CC department-in ramngaw tichereu si loa heng ramhmul damdawi leh ramngaw atanga mihring mamawh mipuiin tangkaia an hman theihna turin hma a la thin,” a ti.
India ram zalenna champhaphak vawi 75-na denchhena hmalakna peng pakhat, Ayush Aapke Dwar hi kum kalta September thla atang khan tan a ni a. India ram pumah ram hectare 75,000 tuam chhuakin ramhmul damdawi tiak nuai 75 sem a ni a. Mizoramah pawh Health Minister Dr R Lalthangliana hovin kum kalta September thla khan a hawng.
COVID len lai a nih avangin in tinah sem a rem lo a, State Medicinal Plant Board office atangin a duh apiangte tan sem chhuah a ni a. Thenzawl Ayush Hospital atangin sem a ni bawk.
Medicinal plant chi hrang hrang 15 chu beneficiary 600 hnenah sem a ni a. Sappling sem chhuah zat hi 27,154 a ni a, hectare ngaa zauah phun a ni.
Kharnaah hian anganwadi hrang hrangten an Nutritional Garden-a an phun tur sappling chu khuallianin a sem a. Khuallian bakah Lallianpuii, Dr Lalnuntluangi Hmar leh Dr S Mara Thansiami te chuan College of Veterinary Sciences & Animal Husbandry Administrative Block compound-ah ramhmul dam dawi tiak an phun a ni.