North East India-a state hrang hrang zirlai pawl te inzawmkhawmna – North East Students Organisation (NESO)-in NE Statewide protest neih tura a rel bawhzuiin nimin khan MZP General Hqrs., Aizawl pawhin MZP Conference hall-ah sit-in protest an huaihawt.
NESO Finance Secretary Ricky Lalbiakmawia’n NE statewide protest huaihawt chhan hrang hrang zingah North East-in time zone hran a mamawh thu leh sorkar laipuiin Myanmar raltlante hamthatna tha zawk pea, an ram buaina a reh hma chuan chenna, ei leh in bakah naupangte zirna ngaihtuahsak tura india sorkar laipui ngennate a tel thu a sawi.
NESO-in sorkar laipuia an thilphut langsar zingah Armed Forces (Special Powers) Act (AFSPA) 1958, dan sakei tia sawi thin hlih te, Citizenship (amendment) act, 2019 hlih te, North East-a state te ramri leh international ramria harsatna awmte a rang lama sutkian te, North East mite tan hnam leh nunphung (culture) mila Educational policy duan te, North East-ah University, technical and vocational institute, medical and engineering college leh research centre a tam thei ang ber din belh te, college leh university-a hetiang lam zirna course dah belh te, NE region-a ei leh bara intodelhna tura Economic development policy tha tak duan te, Act East Policy atan NE chhungah ngei administrative centre dah te a tel.
Hna nei loh (unemployment) vanga harsatna sutkian te, NE special employment zone puan te, central office hrang hranga grade III & IV hna te a state mi leh sate tana dah te, India contistution-ah NE mipuite tan ram leilung hausakna chungchangah ‘special constitutional status’ siam te pawh NESO-in sorkar laipuia a phut langsar zingah an tel bawk.