State Council of Educational Research and Training (SCERT)-in course hrang hrang an pek zirchhuakte chawimawina hun nimin khan an buatsaih a, School Education Minister Lalchhandama Ralte leh School Education Secretary Dr Lalzirmawia Chhangte ten an telpui.
School Education Minister chuan Mizoramah mipui rin ngam sorkar sikul țha a awm theihna turin training chhuakte chu an thawhna țheuhah missionary rilru pua an hna chhunzawm turin a sawm. Lalchhandama Ralte chuan “Zirna siamțha turin zirtirtute tan training neih țhat a pawimawh hle a ni” a ti a. Zirtirtute grade sang zawka an kai dawnin training an kal țha em, tih chu tehfung atan hman a țul tawh thu Education Minister chuan a sawi.
Training chhuakte chu an thil zirte an thawhna sikulah a taka hmang țheuh turin Education Minister chuan a chah a. An thil zirte an hman theih nan office lam pawhin a țul ang ang an bawhzui tur thu a sawi.
Certificate course hrang hrang English language teaching, Early childhood care & education leh Guidance & counselling te chu zirna atana hlu tak tak an nih thu Lalchhandama Ralte chuan sawiin, ECCE chu school 331 velah hawn a ni tawh tih a sawi a. “ECCE hi țha taka kalpui a nih chuan enrolment pawh a tipung dawn a, sorkarin țan a la zel dawn a ni” a ti bawk.
Sorkar thuchhuahin a tarlan danin SCERT hian B.Ed Special education (hearing leh visual) kum 2018 ațangin a kalpui a, seat 30 ve ve an nei. Certificate course pathum an kalpui a, Certificate course in English language teaching zirtirtu 22 an zir zo thei a, Certificate course in early child care & education zirtirtu 24 in an zova, Certificate course in guidance & counselling zirtirtu 38 in an zir zo thei bawk. Certificate course te hi thla 6 chhung zir an ni.