Sorkar laipui chuan India hmarchhak state-te tan Covid-19 tawrhna avanga chhawmdawlna atan Rs Vaibelchhe 1,300 a ruahman.
Union Health Minister Mansukh Mandaviya chuan Thawhlehni khan Guwahati, Assam-a hun a hmannaah hei hi a puang.
“Sorkar laipui chuan hmarchhak state zawng zawngte tan COVID response package Rs Vaibelchhe 1,300 a ruahman (sanction) a ni,” a ti.
Mandaviya hi Assam khawpui, Guwahati-ah hian Thawhlehni khan hmarchhak state-a health minister leh sorkar mi pawimawhte nen thukhawmin a zin a ni.
Mandaviya chuan, “Hripui leng mek dinhmun kan thlir a, invenna pek tawh chin te, hmarchhak state-a ECRP-II kalpui dante pawh hmarchhak state-a health minister-te nen kan sawiho,” tiin a sawi.
“Hmarchhak state pariatte tan hian sorkar laipui chuan Rs Vaibelchhe 1,352.92 a ruahman a. State-te hnenah hian sorkar laipui chuan a puih theihna apiangah a puih zel dawn thu leh ECRP II package chu a nihna tur ang taka hmang turin ka hrlh bawk,” a ti.
“Heng sumte hi COVID-19 kai leh kai loh endikna, damdawi dah thatna, COVID-19 kaite tana khum, naupang lam damdawi in, ventilator leh oxygen dah khawlna leh damdawi lam mamawh hrang hrang atana hman tur a ni ang,” tiin Mandaviya hian a sawi bawk.
Mandaviya hian hmarchhak health minister leh mi pawimawhte hi COVID-19 hripui leng mek dinhmun leh invenna pek tawh dante sawipuiin an thlirho.
Thutkhawmnaah hian Manipur leh Mizorama hripui la leng nasa mek chu sawi zui nasat zinga mi a ni.
Health minister hova thutkhawmnaah hian hri leng thawh thumna lo thleng laka hmarchhak state-te lo inhmakhua dan pawh sawiho a ni bawk.