Thailand chhim lam hmun 17 vel zetah bomb puak leh inhal a thleng a, thuneitute chuan inthuruala miin beihna an thlen ni ngeia an ngaihah hian mi eng emaw zat an hliam tih an sawi.
Bomb puak leh thil hal hi Thawhlehni zan atanga Nilaini zing inkara thleng kha a ni tih sipai leh police thuneitute chuan an sawi.
Chhim lama Pattani, Narathiwat leh Yala province-ah te niin hmun 17 vel a ni a, a tam ber hi dawr tê leh gas station-ah a ni hlawm tih sipai thupuangtu, Pramote Promin chuan a sawi a. Civil mi pathum velin hliam an tuar.
Heng thil hi tute mahin an tihah an la chhal lo.
Police Captain Sarayuth Kotchawong chuan zanlai thlen hma lawka report a dawnah Yala-a Yaha district-ah, gas station-a dawrah mi rinhlelhawm tak pakhat a luh thu a dawng a, a ip dum ah chu nghatin thawktu lo awmte chu thih an duh loh chuan chhuak turin a ti niin a sawi.
Thawktuten an chhuahsan fel hnu minute 10-ah a puak zui ta niin a sawi.
Thailand chhim lam, Malaysia nena an inrinaa province-ah hian kum tam tak chhung hel an awm tawh a; Muslim province an tih mai - Pattani, Yala, Narathiwat leh Songkhla hmun thenkhata hi indan duhin Thai sorkar nen an inbei reng a ni.
Kum 2004 atanga buaina chhuakah mi 7,300 chuang an thi tawh niin helaia tharum thawhna thleng viltu, Deep South Watch chuan a sawi.
Chhim lama Muslim Thai-te hian Buddhist tamna ramah hian en hniam an tawk nasa niin an insawi thin a. Thai sorkar hian chhim lam province-te hi a ngaihsak lo niin an ngai bawk.
Sipai thupuangtu, Pramote chuan a beitute hi motorcycle-in an kal tlangpui a, an beih hmunte hi petrol bomb-in an vawm niin a sawi.
“Helho hian mipuite lakah tharum an la thawh duh tih a chiang a ni,” a ti bawk.