Mizorama a vawikhatna atana buatsaih Mizoram Tourism start-up fest & competition 2022 chu nimin khan SAD Conference hall-ah Tourism Minister Robert Romawia Royte-in a hawng.
Tourism Minister chuan Mizoram Tourism start-up fest & competition chu Tourism tihchangtlunna leh eizawnna atan mi tam zawkin an hman theihna kawngka pawimawh tak pakhat a nih thu a sawi a. Tourism department chu department thawktu tam tak awmna nilo mahse, Mizoram Tourism tihhmasawnna atana hna nasa taka thawktu nia sawiin, an thawhona thain rah tha a chhuah zel niin a sawi.
Mizoram chu India ramah responsible tourism policy mumal taka nei hmasaber state a nih thu Tourism Minister chuan a sawi a. “Mizoram chuan bungthar kaiin, tourism industry-a eizawnna nei te tan leh mimal sumdawng (enterprise) te tan rahbi nghelnghet leh rintlak, inkaihhruaina leh kalphung, dan leh hrai kimchang leh awmze nei policy tha tak, sorkarin a chhawp chhuak tawh a ni”, tiin, “Hei hian eizawnnaa hmang tur leh hmang mek te tan kawng mumal tak sialsakin, hun lo la kal zel turah pawh kori a tu ang” a ti bawk.