Punjab-a Aam Aadmi Party sorkar chuan thlai sengna ro halna atana hman tur khawl 11,000 zet, sorkar lehkhaa awm si, a taka awm si lo chhui chianna tur thupek an chhuah.
Khawl hi mipui sum Rs. Vaibelchhe 150 vel zet eisakna ni thei a ni a, a tam ber hi Captain Amarinder Singh-a kaihhruai Congress sorkar hun lai a ni.
Agriculture Minister Kuldeep Singh Dhaliwal chuan a taka khawl awm lo chungchang report a dawn hnuah a hmun ngeia endik (field survey) turin thawktute a ti nghal a; sorkar laipuiin a man tlawm (subsidy)-a a pek hian ‘lo neitute hnen a thleng lo’ niin a sawi”.
Lehkhaa khawl inziak leh dawngtu turte hnena thleng zat endik hi kum 2018 leh tun thla inkara mi a ni a. Khawl 90,422 zet sorkar laipui hian leitirin lo neitue hnena thleng lo hi 11,275 (13%) vel a awm niin hriat a ni.
Punjab-ah hian AAP sorkar hi March atangin a ding tan a ni.
Minister Dhaliwal chuan he thila a mawhphurtu ber chu hetih laia chief minister, Amarinder Singh a nih thu leh a ni hi Congress sorkar laia ggriculture ministry changtu a ni.
Capt Amarinder-a hi a party, Punjab Lok Congress thupuangtu, Pritpal Singh Baliawal chuan a chhan nasa hle a, “Khawl sem chhuah tur list buaipui hi chief minister a nih anga Captain hna a ni lo. Field officer a ni lo. Ei ruk chhuina erawh engpawh kan lawm em em a; mahse, tuna mi hi chu AAP sorkar hian an hlawhchhamna hliahtu tur an zawnna a ni,” a ti.
Minister Dhaliwal chuan chanchinbumite hnenah, “Chief Minister Bhagwant Mann-a hnenah vigilance department-in an chhuina turin file ka thawn tawh,” a ti.
Sorkar laipuiin subsidy-a khawl a leina man hi Rs. Vaibelchhe 1,200 vel a nih thu minister chuan a sawi a, “Tuna thil fel lo kan hmuh hi Rs. Vaibelchhe 150 man vel a ni,” a ti.
“Hetiang thil fel lo awm hian nakin zela sorkar laipui atanga puihna awm thei anga hmuh a tihharsat phah thei,” a ti a, “Hengte hi mipui sum a ni a, a inhnamhnawih chu tu pawh ni sela, na takin action kan la dawn” a ti.
Punjab state sorkarin hetiang a sawi mek lai hian thil thlen hun laia sorkarna chelhtu, Congress chuan engmah an la sawi ve lo.
Congress hun laia chief minister, Capt Amarinder-a hi kum 2021 tawp dawn, assembly inthlan dawn tepah an party hian an paih a, insiksawi satliah angin insawi mah se captain hian party chhuahsanin party thar a din a ni.