India chhim lam, Tamil Nadu-a khaw pasariha cheng mi eng emaw zat chu fanghmir chi khat, yellow crazy ant an tihin nasa takin a tibuai mek.
Heng rannung te tak tê hian ran vulh leh thlai chin a tichhe nasa hle a, an khawsak zelna tur a buai phah hlauhthawnna a lian hle.
Tamil Nadu-a a beihte hi Dindigul district-a Karanthamalai forest hnai tlangrama mite an ni a, a mi cheng tam ber hi lo nei leh ran vulh an ni.
“Ramngaw kan hnaih deuh chuan min lo bawm a, a thak a, a durh thin a. Tuiah pawh an awm avangin tui pawh kan chawi thei lo. Engtia tih tur nge pawh kan hre lo,” tiin lo neitu, kum 55 mi, Selvam chuan a sawi.
Tun hma pawhin hetiang fanghmir hi an hmu fo tawh a; mahse, tun anga tam leh an nun tibuai khawp an ni ngai lo tih an sawi.
Ramngaw hnaiha ran vulhtute chuan an rante chu hmun dangah an sawn a ngaih phah hial thu an sawi.
Tual chhunga forest officer Prabhu chuan thuneitute hnenah thil thleng chu survey-a report thehlut turin a ti a. “Report ka dawn hma chu engmah ka sawi thei rih lo,” a ti.
Sorkar ran daktawr, Dr Singamuthu chuan an hmelhmang chu fanghmir dang ang bawk niin a sawi.
“Engvanga pung chian nge an nih kan hre lo va, thunun dan tur pawh kan hre lo. A tuar mektuten fanghmir vang nia an sawi pawh a ni em tih sawi chian a har,” a ti a. Ran vulhtute chu ram ngawah tlattir rih lo turin an ti tih a sawi.
Khaw mite hian an ran vulhte bakah rul leh sazu thlengin heng fanghmirte beihna avang hian an thi niin an sawi.
Dr Baidya chuan fanghmir tam takin formic acid an phurh chhuah chu ran dang mitah nghawng a nei niin a sawi a; mahse, an mit tak hi an tum kher em tih erawh hriat a ni lo tih a sawi a. Mihringah chuan acid hian thil eng emaw chu a thlen thei ngei a; mahse, nunna atana hlauhawm erawh a ni lo tih a sawi bawk.
Mi thiamte chuan he rannung hian helaia khuarel thil awm inbuktawk sa chu a tihchhiat an hlau hle.
Australia-a Christmas Island an beih hmasa ber tum khan a lo awm sa fanghmirte an luahlan vek niin Dr Baidya chuan a sawi a. Thliarkara chakai sen maktaduai tel an tihlum bawk niin a sawi.