Fridge hi chhungkaw tinin kan neih deuh fur tawh a ni na-in chinchang kan hriat erawh a la tlem hle awm e.
Kan hriat a tana tul zual chauh tar lang thuak thuak i la a tawk viau mai awm e.
- Fridge kawngkhar hi a phui that a pawimawh khawp a, phui taka khar thin tur a ni, a phui that loh chuan a khawl a rim bik bakah, fridge gas kan tih mai thin, refrigerant gas hi a hek em em bik a, chu mai bakah pawn lam boruak a dawn reng hian boruak a tuihu awmte hi fridge chhungah khan vurah lo changin vurah a lo insiam a, vur khawn a insiam zung zung thin.
a) Single door ah chuan heng vur khawnte hi a freezer-ah hmuh mai theihin a awm thin a, awlsam taka tih fai ve mai theih a ni, i tih fai duh chuan fridge ah power supply ti tawp la, a tui hun nghak rawh, a lo tui vek hunah pawnche thianghlima hruk hul mai tur a ni, hre lovin thenkhatin kar khawh an tum thin a, freezer an kar pawp fo thin, freezer pawp hi repair theih a ni lova, thlak hlawk ngai a nih thin avangin sum senso a tam lo thei lo, thawmphui thei ni a insawiin fridge siam thin inti tamtakin mi an bum fo va, a neitute lam an in sengso thlawn thin a ni.
b) Double door-ah erawh chuan vur khawn hi freezer awmna compartment chhungah daih vur khawn hi a insiam thin avangin single door a vur khawn awlsam taka hmuh theih ang hian a awm ve lo, compartment chhung daihah cooling chamber a awm avangin vawt insiam hi fan hmanga chhem chhuah tir a ni thin a, vur khawn a tam chuan a fan hi a chiah chhe thei bawk, a hnung lama tui chhe paih chhuahna tur pipe an dah hi vur khawn hian awlsam takin a hnawh ping thin a, a hnawhpin hnuah vur khawn hi a lo pung zel a, a hnuai lama boruak vawt a supply-na kalkawng hnawh ping zelin, a hnuai lam a vawt mumal lo hmasa thin, vur khawn a lo tui chang hian a tui chhe paih chhuahna tur ber pipe ah a luan theih tawh loh thin avangin a remchanna lai laiah tui hi a lo hnam chuak thin, hetianga i fridge a awm a nih chuan a rang thei ang berin fridge siam thiam panpui ang che.
a) Single door ah chuan thlai hnah leh rah te han dah hian a duk zung zung thin a, kar lovah a tawih mai thin, chutianga i fiidge a awm a nih chuan a siam thiam panpui nghal ang che, i remchang mai lo a nih chuan ni khatah vawi hnih darkar khat chhung vel ti nung la, a bak chu off mai tur.
b) Double door ah erawh chuan, by metal emaw timer emaw chhiat vang a ni thei, a eng emaw zawk zawk a chhiat chuan, a vawh lutuk vangin compartment chhungah vur khawn nasa takin a insiam thin a, chu chuan a hnuai lama boruak vawt fan-in a chhem thlakna kalkawng a hnawh ping a, a hnuai lam a vawt thei lo hmasa phawt thin, ngaih thah rei chuan vur khawn hi lo pung zelin a fan vir thei lovin a siam a, a fan a chhiat phah thei bawk, hetianga a awm hian thenkhat chuan an defrost mai thin a, chu chu a that hlenna turah an ngai fo, mahse chumi thlentu zawk a chhe lai siam that a nih loh chuan harsatna pangngai chiah a thleng nawn leh thin. Hetiang harsatna tawh vanga fridge siam thiam koh a, defrost a tha mai tura an ngaih hian a hnu rei vak lovah a chhiat dan pangngai bawk a chhe lehin fridge siam koh an ngai zut thin.
- Fridge vawt thei lo vanga buaina hi buaina tlanglawn ber a ni fo, kawng hrang hrangin he thil hi a thleng thei a, a vawh theih loh hian tamtak chuan a gas a zo a nih an ring mai thin, a tam ber zawkah chuan thil dang chhiat vang a ni fo zawk, tin, fridge gas thun hi a thiam panngai leh training chhuak chauh tih tir ang che. Fridge gas thun (refill) tur hian hriat tur pawimawh hriat ngei ngai tam tak a awm avangin thun thiam inti nazawng an rintlak vek loh tih hriat a tha.