Aizawl: Mizoram Taxation Department-in Goods & Services Tax(GST) pe tha duh lote chu an bank account freeze-sak te, an motor leh bungraw dang hrensak leh tihralsak thlengin, a tul angin hma an la tawh dawn.
Nimin khan Taxation Department chuan an Auditorium-ah Mizorama Bank hotute leh Mizoram sawrkar hnuaia DDO te tan Goods & Services Tax(GST) chungchang inzirtirna leh inhrilh hriatna an buatsaih a, he hunah hian department hotuten chhiah pe tha duh lote lakah hremna pek a nih tawh tur thu hi an sawi chhuak a ni.
He huna thusawitu Commissioner of State Tax Kailiana chuan chhiah chu mipui pek khawm a nih avangin a nih dan tur dik takin sorkarah a lut tur a ni a, chutiang a nih theihna tur chuan theihtawp an chhuah zel dawn tih sawiin, chhiah pe tha duh lote lakah hremna pek an nih tawh tur thu a sawi.
He huna GST chungchang zirtirna petu, Taxation department hotute chuan GST chu Mizoram sorkarin a sum hmuhna ber a nih avangin theihtawp chhuaha hma an lak thu leh chhiah pe tha duh lo an awm thin avangin theihtawp chhuaha thawhpui turin bank hotute leh sorkar officer-te an sawm a, chhiah an khawn kawnga department thawhpui tha duh lo officer-te pawh pawisa chawitir thlenga hremna a awm thute an hrilhfiah bawk.