Aizawl: Mizoram State AIDS Control Society (MSACS) leh Central YMA chuan Mizorama HIV/AIDS darh zel tur ven nan leh fimkhur inzirtirna turin ‘Zoram Harh Rawh’ tih thupui hmangin hnam lâm leh pipu zaia inelna buatsaih an tum.
Hemi chungchang ngaihtuahtu, State Level Organising Committee chu nimin khan Central YMA Committee Room, Tuikhuahtlangah an thukhawm a, he hun kaihruaitu Central YMA President R.Lalngheta chuan HIV/AIDS chu tih tak zeta do a pawimawh avangin CYMA pawhin a kalphung pangngai pelin ke a pen a ngai tih sawiin, “Sawiselna tam tak karah pawh ram leh hnam tana tha turah chuan CYMA-in theihtawp a chhuah zel dawn,” a ti.
MSACS Project Director Dr. Lalthlengliani chuan HIV/AIDS-a Mizoram dinhmun tlangpui sawiin India ramah Mizoram chu kum 15-49 inkar mihring za zelah HIV/AIDS vei tamna ber a nih avangin tun anga a darh zel chuan a hnam pum anga min tiral thei tur natna a nih avangin a dona kawngah tha thlah ngam a nih lohzia a sawi a ni.
‘Zoram Harh Rawh’ tih thupui hmanga hnam lâm leh pipu zaia inelna an buatsaih turah hian district tinah inelna buatsaih phawtin, chuta pakhatna tan state level competition buatsaih leh a ni ang.