Afghan khawpui, Kabul-a mi tam tak awmna mosque-ah thil na tak puakin mi 21 an thi tih police-in an sawi.
Mi dang 33-in hliam an tuar bawk tih Kabul police thupuangtu, Khalid Zadran chuan a sawi.
Nilainia thil thleng hi tlai lam tawngtai hun laia mi a ni a. Mosque-a an puithiam (imam) pawh thi zingah a tel nia sawi a ni.
A titute hi hriat an la ni lo va, kar hmasa maiah khan Islamic State (IS) helhovin Taliban thlawptu puithiam chu Kabul-ah thi thihchilh bomb hmangin an lo that tawh thung.
Venhim hna thawktute chuan Kabul-a thil a puahna hmun hi mi dang tlawh theih loh turin an dang rih.
Thil thleng hmutute chuan a puak hi a na hle a, a bula in dang tukverhte pawh a sawi che nasa hle tih an sawi.
“Mi tam tak thi ka hmu a, thenkhat chu mosque tukverh atanga a rawn vawrh chhuahte a ni,” tiin a hmutu pakhat chuan Reuters news agency a hrilh.
Damdawi hmanga puitu pawl, Kabul-a damdawi in lian tak enkawltu ni bawk, Emergency-a an hotu, Stefano Sozza chuan mi 35 an enkawl thu leh an zingah hian naupang pawh an tel tih a sawi.
“Kan doctor-ten zankhuain zai ngai an zai a. Hliamte hi an taksa chhunga thil lut leh kângte an ni,” a ti.
Thil puak hi mosque chhung a nih a ring a. “A titu hi tawngtai hun laiin a lut ang a, mi an tam lai takin a thil pai a tipuak a ni ang. Amah hnaih deuhte an thi a, thi em lote pawh hliam na tak an tuar zui ta a ni ang,” Sozza chuan a ti.