Aizawl: Clover Organic Private Limited, Dehradun hmalaknain Tuichangral Organic Farmer Producer Company Limited, Khawzawl district lakhuihthei thar chu nimin khan Millennium Centre kawt zawlah zawrh chhuah runpui neih a ni.
Lakhuithei chingtuten kharchhawngtu awm loa anmahni ngeiin hlawk zawka an hralh chhuahna hun, a ni khatna, nimin khan lakhuihthei pum 1,200 chuang zawrh chhuah a ni a, vawiinah pawh zawrh chhuah runpui hi chhunzawm leh a ni dawn.
Tuichangral Organic Farmer Producer Company Limited hi Khawzawl district chhunga lakhuihthei ching khaw hrang hrang pariat – Tlangpui, Tlangmawi, Khawhai, Lungtan, Vangtlang, Sialhawk, Chalrang leh New Chalrang intelkhawmte din a ni.
Company hotute chuan lakhuihthei an thar chhuahte chu hmunpui lama zuar chhuak tura harsatna an neih thin avangin man tlawm tê-in kharchhawng hnenah an hralh a, mipui hnena hralh chhuahna erawh a to hle tih sawiin, Clover Organic Private Limited ruahmanna hnuaiah Aizawlah ngei lakhuihthei chu a leitu tan man to si lo, anmahni tana hlawk tur siin an hralh chhuak thei ta chu an lawm hle tih an sawi.
Lakhuihthei zawrh chhuah runpui buatsaihtu hi Mission Organic Value Chain Development for Eastern Region hnuaia Service Providing Agency an ni a, lakhuihtheiu chingtute bakah hian Mizorama dragon fruit chingtute pawh a hralh chhuah kawngah hian an lo pui tawh.