Samagra Shiksha Mizoram leh Cricket Association of Mizoram te chuan Ningani khan Chanmari YMA Hall-ah an thawhdunna Grassroots Cricket School bul tanna Hit- off Programme an hmang.
School Education Minister Lalchhandama Ralte chuan khuallian niin a hman pui a. Sports & Youth Services Minister Robert Romawia Royte chu khualzahawm a ni.
Cricket zir tanna tha
Samagra Shiksha Mizoram leh Cricket Association of Mizoram te hian April 12, 2022 khan kum nga chhung daih tur thawhhona thuthlung hi an ziak tawh.
Aizawl khawpui chhunga sawrkar elementary school 10-ah Grassroots Cricket School hi bul tan a ni a, school tinah zirlai mipa 40 leh hmeichhia 10 zel an awm.
Kum thar atangin District dangah pawh kal pui zel tum a ni. Sikul zirlai tibuai lo turin kar khatah vawi hnih emaw vawi thum emaw training an nei thin ang.
Sum leh pai senso ngai zawng zawng leh cricket thuam thil leh training-na atana mamawh CAM ten an tum a, a bak tul dang zawng chu Samagra Shiksha Mizoram in a tum thung.
Naupang talent nei tha zual te kumtin National Cricket Academy Bangalore-a training an neih dan tur kawng zawn a ni ang a, Mizoram pawnah exposure trip neih tir thin an ni bawk ang.
Grassroots Cricket School ah hian qualified coach bakah, school coordinator ruat an ni a. Grassroots Cricket School a zir chhuak te hi CAM in Mizoram aiawha National Age Level Tournament hrang hrangah player zawnna hmun pakhat atan a hmang ang.
School Education Minister Lalchhandama Ralte chuan bul tanna atana thlan sikul 10 te chu a hmahruaitu an nih avangin inpe leh taima taka zir turin a chah a, zirtirtute pawh sikul vannei an ni tih hriaa tan la turin a fuih.
CAM leh Samagra Shiksha an thawk dun thei chu kawng hrang hrangin a tu lam ve ve tan pawh a vanneihthlak tih sawiin sikula cricket zir a lo ni ta chu cricket-in a kawng zawh tur dik tak a zawh a ni a ti.
Sports & Youth Services Minister Robert Romawia Royte pawhin cricket hlutzia sawiin sports ah chuan sum leh paia inghahna nei tha, inrelbawlna fel tak nei, CAM pawh sorkar tanpui ngai lo intodelh tak an ni a, sum leh pai thawh chhuahna tha an tling a ni a ti a, hetianga belh tlak cricket zirna school ah neih a ni thei chu lawmawm a tih thu a sawi.