British billionaire Sir Jim Ratcliffe chuan Manchester United a lei duh. United neitu Glazer chhungkua in club a neitu nihna thenkhat chu hralh an phal nia sawi thawm a awm hnuah Ratcliffe hian lei a duh tih a aiawh chuan a sawi.
Kum 69 aiawh chuan hemi chungchang hi sawifiahin, “Club hi zawrh a nih chuan Jim hi lei thei tur zingah a tel ngei a. Hetiang zawng hian thil a kal dawn a nih chuan hun rei zawk chhung club neitu kan nih theihna tura hmalak hi kan inpeih.” tiin a sawi.
Vawi 20 English champion ni tawh United hi Premier League table mawng ber a awm mek an ni a, manager thar Erik ten Hag hnuaiah beiseina sang tak nen tun nipui hmang mahse an match hmasa pahnihah an tlawm.
Bul an tan that loh avang hian United club neitu, sawisel hlawh thin tak Glazer chhungkua sawiselna a nasa leh zual a. Club tana sum an hman dan leh club an enkawl dawnah fans te duhkhawp lohna a lian hle.
Tun nipuiah player lakluh an tum a kaltluang hleithei lo fova, an manager in a duh ber Dutch midfielder Frenkie de Jong chu Barcelona atang an lalut thei lo. Hetihlai hian superstar striker Cristiano Ronaldo chuan Old Trafford chhuahsan a tum ve mek bawk.
Neitu thar an awm dawn em?
American sumdawng Glazer-te hian United fans te duh loh an hlawhna a rei tawh hle a. Nikum May thla khan Liverpool nen Old Trafford a an inkhel tur sawn hlat ngai hial in an dodal tawh.
Kum 2013 a manager ropui Sir Alex Ferguson a chawlh hnuah a zuih zawngin an kal a, kum 2017 hnuah trophy an la chawi leh lo.
Tun dinhmunah Glazers hian United neitu nihna thenkhat hi hralh an phal niin an sawi a, mahse neitu pumhlum nihna erawh hralh an phal lo.
United neitu nihna thenkhat hi Glazers hian Pound tluklehdingawn 5 vela hralh an phal a, neitu pum nihna erawh hei ai hian a la tam hle ang.
Lancashire a piang Ratcliffe hi chemical company INEOS neitu a ni a. Manchester United tantu a ni bawk.
Infiamna lamah a mikhual lova, French football club OGC Nice neitu a ni a. Swiss club Lausanne-Sport bakah khawvel cycling team hlawhtling INEOS Grenadiers cycling te a hnuaiah awm bawkin Mercedes F1 team nen pawh an thawkdun.