Thenzawl Zone Football Association in Independence Day Football Tournament an buatsaih chu khelh zawh a ni a. Final-ah 1-0 a chak Field Veng Branch YMA an champion.
Serchhip District hnuaia Zone FA zing ami Thenzawl inelna buatsaih hi Ningani khan khar a ni a, Mizoram State Sports Council Secretary John Tanpuia’n kharna hun a hmanpui.
Final hi Thenzawl Field Veng Branch YMA leh Neihloh Branch YMA ten an khel a. R. Lalnunpuia chuan inkhel a goal awmchhun khungin 1-0 in Field Veng Branch an chak.
Champion team in trophy bakah lawmman pawisa Rs. 15,000 an dawng a. Pahnihna in Rs. 7,000 an dawng.
Mimal chawimawinaah Neihloh Branch YMA goalkeeper Lalrinpuia chu Best Player a thlan a ni a. Tun tournament a goal 10 khungtu Neihloh Branch player tho Lalramtiama chu top scorer a ni bawk.
Thenzawl Zone Football Association hnuaia I-Day football-ah hian Thenzawl khawchhung YMA Branch 9 atangin team 11 bakah Kanghmun South, Zote South, Neihloh leh Buangpui Branch YMA team te an teal a, a vawiin team 15 an inel.
August 8 atangin tournament hi khelh tan a ni a. Final hi August 15 khan khelh tura duan a nihlaiin Thenzawl in vanduaithlak takin tui tla ruang zawn ngai an neih avangin ni hnih chawlh a ni.
Tournament kharnaah hian khuallian MSSC Secretary chuan Sports Council in Mizoram leh infiammite tan hma a lak zel tur thu a sawi a. Rualbanlo infiamna thlenga chawikan an tum thu a sawi.
Khuallian hian Thenzawl Zone Football Association hnenah hian Rs. 40,000 leh ball paruk a pe bawk.