Hleilenna hrang hrang tuar hmeichhiate tlukluh lailawkna hmun One Stop Centre (OSC), Lawngtlai Bazar Venga ami chu nimin khan Lawngtlai Bawrhsapin Amol Srivastava-a’n a tlawh a. Lawngtlai College Venga One Stop Centre building thar sak mek tlawhin a enfiah bawk.
Lawngtlai Bawrhsap chu OSC-a thawk ten an dinhmun te lo hrilhin, mamawhte an lo thlen a. Hmeichhiate himna atana hmalak zel dan tur te an sawiho nghal.
Lawngtlai College Venga OSC building thar sak mek chu peihfel ṭep ni tawhin, Bawrhsap chuan duhthusam tawk lo lai siamṭhat tur te, luahluh hmaa chulmam leh tuaihnum ngai lai te a enfiah a ni.
OSC hi hleilenna hrang hrang tuar hmeichhia ten vanduaina emaw, an sutkian zawh loh harsatna an tawh emawa an tlukluhna leh an inhumhim lailawkna tura din a ni a. Rikrum thila ṭanpuina pek te, an hliam enkawlsak te, dan hnuaia an dikna chanvo an chan theihna tura ṭanpui te, an rilru hahdamna tura kawm te, riahna tur leh ei tur lo buatsaihsak hna te an thawk ṭhin.
Lawngtlai OSC hi tum khata mi panga thleng awm theihna niin, thawktu 9 an awm a. OSC a tlulut te chu OSC-ah ni nga leh zan nga chhung an awm thei a, chumi hnua pan tur dang an hriatloh chuan hun rei zawk awm theihna home dangah an awm zui theih dan tur ngaihtuahsak ṭhin an ni.