Mizoram sorkar flagship programme, SEDP hnuaia chhungkaw thlurbinga tanpuina (family oriented) hawngtu, Chief Minister Zoramthanga chuan tun dinhmunah SEDP tanpuina chu chhungkaw khatah Rs 50,000-in sem dawn rih mah se a tira an ruahman anga Rs nuai 3 emaw, a aia tam emaw sem chu an tum ngheh a nih thu a sawi.
Mizoram sorkar chuan nimin khan Vanapa Hall-ah SEDP Family Oriented hawnna inkhawm an buatsaih a, a hawngtu chief minister chuan mipui leh ram hmasawnna tura an duan SEDP chu a tirah an duan chhungkaw khata Rs nuai 3 sem chu tun thlenga an tum a la nih reng thu a sawi a, sorkar sum harsatna avangin tuna bul an tanah erawh a tira an ruahman anga an la tih theih loh thu a sawi.
Zorama chuan a bultanna atan SEDP chu chhungkaw 60,000 hnenah Rs. 50,000 theuha sem a ni dawn a, 1st installment-ah Rs. 25,000 sem phawt a ni dawn tih a sawi a, “A rang thei ang berin 2nd installment sem tum a ni,” a ti.
Eptu party-ten SEDP sem tura an nawr thin chungchang sawiin, Covid-19 vanga ram pum sum harsatna avangin Mizoram budget-a tel tawh leh central atanga an dawn thin tesepte nen Rs vaibelchhe 3,000 dawn hmuh a ni lo a, hei vanga sum harsatna thleng karah eptu lamin SEDP chu sem turin an nawr tih a sawi a, “SEDP hi kan sem theih an rin loh vang a niang,” a ti.
Tunah sorkar sum dinhmun a that chho deuh hnuah SEDP an han sem tak turah ‘SEDP sem rawh se’ tia nawrtuten lawmthu an sawi ngei pawh a beisei tih Zorama chuan a sawi.
CSS sum pek chhuah avanga sum harsatna thleng chungchang sawi bawkin, “Sorkar laipuiin CSS sum chu pek chhuak vek tura thupek a chhuah a, vawilehkhatah Rs vbc 5 pek chhuah pawh a tam laiin vaibelchhe 600 lai mai chu pek chhuah a ni a, tah chuan a bur kha a kawrawng ta reng a,” a ti.
SEDP sem kalpui an tum chhoh laia sum bawm a ruak chuan finance department lam hotute lu a ti hai hle tih sawiin, hetihlai hian Pathianin hun remchang a rawn siamsak a, central atanga share taxes an hmuh thin chu a let aia tam hmun a ni chho a, sum dang lo kal te nen sorkar hnathawk hlawh an pek theih vek bakah leiba eng emaw zat an pe chhuak thei tih a sawi a; sorkarin sum harsatna a tawh laia sum leh pai enkawl thiam lo tia puhtute erawh tunah chuan an ngawi leh ta thap mai tih a sawi.
Chief Minister hian chhungkuaa SEDP tanpuina sum an sem tur Ist Instalment chu a hlawmin Line Department 9 te hnenah a cheque in a hlan a, Agriculture Department hnenah mi 9161 tan Rs 23,36,05,500, Animal Husbandry & Veterinary Department hnuaia mi 25,399 tan Rs 64,76,74,500, Commerce & Industries Department hnuaia mi 13,266 tan Rs 33,82,83,000 cheque a hlan.
Heng bakah hian Fisheries Department hnuaia tanpuina dawng tu mi 1261 tan Rs 3,21,55,500, Horticulture Department hnuaiah mi 4078 tan Rs 10,39,89,000, Land Resources, Soil & Water Conservation Department hnuaia mi 5680 tan Rs 14,48,40,000, Sericulture Department hnuaiah mi 300 tan Rs 76,50,000, Tourism Department hnuaiah mi 26 tan Rs 6,63,000 leh Urban Development & Poverty Alleviation Department hnuaia tanpuina pek tur mi 828 tan Rs 2,11,14,000 cheque a hlan bawk.
SEDP Family Oriented hawnna inkhawm hi Deputy Chief Minister Tawnluia’n a kaihruai a, SEDP Executive Board-a Member Secretary Pu Lalmalsawmna Pachuau, Planning & Programme Implementation Department Secretary chuan Family Oriented SEDP hnuaia tanpuina thlan dan te, Trade hrang hrang leh a kengkawh tur Line Department te, thlen chin te, hmachhawp hnaivai leh hmachhawp dangte, endikna kalpui dan te tarlangin, SEDP Executive Board Vice Chairman H. Rammawi chuan thu a sawi bawk a ni.