Europe khawmualpui chhim lam leh laili laia thlipui thawk leh ruahpuivanawn sur vangin mi 12 vel an thi a, naupang pathum an tel.
Thite hi thing tluin a delh avang an ni tlangpui a, Italy leh Austria bakah French thliarkar, Corsica-ah te a ni.
Thliarkarah hian ruah leh thli hian camp-na hmunte a tichhe nasa hle a. Hetih lai hian Venice, Italy-ah chuan St Mark’s Basilica-a an dar khaina chhip sanga lung rem a tichhe bawk.
Europe hmun thenkhata ruahpui leh thlipui thawk hi a hma lawka khaw lum uchuak tak leh khawkheng nasa tak an tawrh hnu lawka thleng a ni.
Corsica-ah hian thli hi darkar khata km 224 zeta chak a ni a, thingkung len thluin in kal thei (mobile home) a tichhe nasa hle.
Thuneitute chuan camp-na hmuna thing tluin hmeichhe naupang kum 13 mi a delh hlum tih an sawi.
Mipa kum 46 mi pawh thing tluin a delh hlum a, pitar pakhat chu tuipui kama chawlhna an siam in chung hawkin a car-a a awm lai fuhin a thi bawk.
Tuipuiah sangha mantu kum 62 mi leh lawng tê (kayak)-a inkar hmeichhia kum 60 mi an thi bawk.
Interior Minister Gérald Darmanin chuan Ningani khan Corsica hi a tlawh tawh a, mi 20 vel an inhliam thu leh an zinga pali chu an na hle tih a sawi.
Chhiatna dang thleng thei avangin Ningani tlai thleng khan pawn lama intihlima inkulh (camp) mi 13,000 dawn hmun himah lak niin vantlang inah dah an ni a; mahse, Zirtawpni tuk khan thuneitute chuan chutiang thleng thei chu a awm tawh rih lo tih an sawi leh.
Thlipui leh ruah thawk hi sik leh sa inthlak nasa avangin a na tawlh tawlh zel niin mi thiamte chuan an sawi.
Thil thleng hmutute chuan ruah leh thli thawkah hian inrin hman a nih loh thu leh inralrinna dar khawn pawh a awm lo tih an sawi.
Thingpui dawr neitu, Cedric Boell chuan, “Khatianga nasa kha kan beisei lo hrim hrim a, tropical storm na tak ang mai a ni,” tiin Reuters news agency a hrilh.
French ram pangngaiah chuan chhim lamah power tihtawpna a tam hle a, an khawpui pahnihna, Marseille-ah chuan kawtthlerah tui a tling nasa hle bawk.
Austria-ah hmeichhe naupang kum li mi leh kum riat mi chu Carinthia-a dil bulah thing tluin a delh hlum.
A hnuah Lower Austria province-ah hmeichhe pathum pawh thing tlu bawkin a delh hlum leh.
Thuneitute chuan mi 13-in hliam an tawrh thu leh an zingah naupang panga an tel tih an sawi.
Hmeichhe naupang pahnih thihna, Wolfsberg district Mayor Hannes Primus chuan an hmunhma vel chu ‘indona hmun ang mai’ a nih hial thu a sawi.
Hetih lai hian Italy-ah chuan Tuscany-ah hmun hrangah thing tluin mipa leh hmeichhia a delh hlum ve bawk.
Venice-ah chuan thlipui na tak a thawk a, St Mark’s Square-a café-a an nihliap liante chu a la a, cathedral belltower-a leirawhchan rem pawh tlem a tichhia.
Tuscany bakah a hmar lam deuh, Liguria-a tuipui kama chawlhna hmunte chu thlipuiin a tichhe nual bawk.
Tuscan regional leader Eugenio Giani chuan social media-a Piombino-a thlipuiin ferris wheel a tivir lai video a tilang.
Hetih lai hian Italy chhim lamah chuan khua a la lum chhunzawm zel a, Sicily-ah chuan 40°C lai a ni.
Mediterranean Sea kam lehlam, Algeria-ah pawh nasa taka ram kangin mi 38 vel an thi tawh.
Europe khawmualpui hmun hrang hrangah hian chawlhkar eng emaw zat khaw lum uchuak tak leh khaw ro tak an lo tawng tawh.
Mi thiamte chuan khaw awm dan uchuak tak tak hi sik leh sa inthlak nasa lutuk avangin a tam tawlh tawlh a, a na tawlh tawlh bawk niin an sawi.
Khawvel pum hi industrial era hun lai aiin 1.1°C chuangin a lum tawh a, sorkar hrang hrangin khualrel tichhetu tihchhuah tihtlem tumin tan an la a, awmzia a la awm tam thei lo thung.