Italian striker Gianluca Scamacca chuan West Ham United a zawm hnua an tana a goal hmasa ber a khung a. Ningani zanah Danish club Viborg lakah goal a khung a. 3-1 in Hammers hi an chak.
London Stadium a UEFA Europa Conference League play-off first leg inkhelah Pound maktaduai 30.5 man Italy striker hi a vawikhatna atan David Moyes chuan inkhel bul a tan tir a. Goal khung turin minute 24 chiah a mamawh.
Amah anga lakluh thar ve tho forward Maxwel Cornet chuan veilam atang a skill tha a lantir hnuah ball a vawrh lut a, palian Scamacca hian a tauh lut chiang hle.
Premier League a an match hmasa pahnih a goal an khung loh hnuah Hammers in tun season a vawikhatna atan hnehna an chang a. Jarrod Bowen chuan an goal hnihna a khung a, mikhual lamin Jakob Bonde hmangin goal khat khung ve mahse Michail Antonio chuan an goal hnuhnung ber a khung ve leh.
Karleh Ningani zanah Viborg khelmualah return leg khelh a ni dawn a, an ni pahnih inkara hnehna chang zawk hian September 8 atanga khelh tan tur group stage an lut ang.
Inkhel dangah Spanish club Villarreal in Ciutat de Valencia-ah Croatian club Hajduk Split an mikhual a, 4-2 in an hneh.
Stipe Biuk chuan mikhual team lam tan minute hnihnaah goal khung nghal mahse Yellow Submarines in José Luis Morales goal hnih leh Gerard Moreno goal bakah own goal vawikhat hmuh belh bawkin an chhanglet.
Italian club Fiorentina in Nicolas Gonzalez leh Arthur te goal khung hmangin 2-1 in FC Twente an hneh a. French club Nice erawh tlawmin Maccabi Tel-Aviv in Stipe Perica goal khung hmangin 1-0 in an hneh.