Mizoram sorkar-in kawlphetha a leina man ba a rulh theih loh avangin Indian Energy Exchange-a kawlphetha a lei leh a hralh phalsak a ni rih lo.
Power & Electricity department hian kawlphetha a leina chu July thla thleng khan Rs vbc 83 bawr vel a ba mek a, a rulh hun chhunga hunbi tiamah a rulh thei loh avangin hrem a ni.
Hemi chungchanga The Zozam Times zawhna chhangin P&E department hotute chuan, July thla thlenga an leiba chu Rs vbc 80 bawr vel a nih thu sawiin, ba thinna an dawn atanga ni 45 chhung pek tur a ni a, chumi hun chhunga an pek theih loh avangin sum an chawi a ngai tawh tih an sawi.
Ni 45 hnuah late fee an chawi a ngaih tawh bakah ni 75 a liam hnuah pawh ba chu an la rulh theih tak loh avangin Indian Energy Exchange atanga kawlphetha a lei leh a hralh chu phalsak an ni ta lo tih an sawi .
P&E department hotute chuan tun dinhmunah hremna tawk mah se power process management hmangin Mizoramin kawlphetha a dawn tur ang erawh a la dawng reng tih an sawi a, “Hetih rual hian kawlphetha chungchanga Mizoram dinhmun chu a tha lutuk lo,” an ti.
Kawlphetha lei man ba rulh a nih theih nan finance department hotute an ngen thu P&E department hotute chuan an sawi a, hetihlai hian nimin tlai thleng khan leiba hi state sorkarin a rulhsak leh sak loh erawh an la hre lo tih P&E department hotute chuan an sawi bawk a ni.
Kawlphetha leina man ba rulh theih loh avanga hremna tawk hi Mizoram chauh an ni a, UT leh state 11 dangte pawh hrem niin, Indian Energy Exchange atanga kawlphetha an lei leh an hralh phalsak a ni rih lo.