Tunkar a thuthang a awm tan chhoh hnuah Manchester United leh Real Madrid star Casemiro te an inrem hnai a, Brazilian midfielder hian Old Trafford a pan mai dawn a ang sawt hle.
English club hian midfielder tha mamawhin tun nipuiah an dap kual nasa hle a. Player hrang hrang nen sawizawm an ni bawk a, tunah erawh Brazil midfielder rinrawl lakluh tumin an bei a. Beisei nei sang taka an dawr hnuah an hlawhtling dawn a ang.
Real Madrid lamin an player hi Pound maktaduai 60 vel bawra hralh an phal a. United coach Erik ten Hag chuan Barcelona midfielder Frenkie de Jong duh mahse a insawnna tur an tih fel hleihtheih loh avangin United in Champions League vawi nga chawi tawh midfielder lam an hawi.
Chiang zawkin
United in Casemiro hi an dawr tan tirhin mi tam takin beiseiawmah ngai lo mahse club in beisei an nei tlat a, an tisual dawn lo a ang hle.
Real Madrid hian tun nipuiah Aurelien Tchouameni an lalut bawk a, hei vang hian Santiago Bernabeu-ah Casemiro chu 1st team player tawnhriat ngah nimahsela a hmun a nghet thlap tawh lo nia hriatna a awm.
Kum 30 mi ni tawh hian Spain-ah a chawi theih chu a chawi kim vek tawh a, hei vang hian chona thar hmachhawn a chak thu a coach Carlo Ancelotti pawhin a sawi a. United lamin Real Madrid a contract a neih aia rei zawk leh lian zawk pek an inhuam avangin a tan contract lian ziah leh chu thil hnawl har tak a ni ang.
Eng nge a nghawng?
Hmun thenkhatah chuan Casemiro hi a club in a chhuahna tur an dal dawn loh avangin Zirtawpni zan khan medical nei turin England a pan dawn ni te in an sawi a. Tun kartawp hma erawhin a insawnna tihfel a nih hman a rinawm lo.
Hetihlai hian United ian Netherlands international De Jong chu an la ngaihven thova, mahse tun nipuiah an lalut thei ang em tih a chiang lo.
Tun nipuiah Casemiro an lalut fel a nih pawhin midfielder dang pakhat an la duh a, Brighton midfielder Moises Caicedo chu an ngaihven nia sawi tel a ni a. Cristiano Ronaldo chhuahtir a forward pakhat lak an tum niin sawi a awm bawk.