Ethiopian Airlines thlawhna khalhtu pahnih chu an zinkawngah an lo muthlu nasa deuh va, an tumna hmun tur pel rakin an thlawk a; mahse, eng em an tawk lo hlauh.
Aviation Herald-in a tar lan dan chuan he thil hi Thawhtannia thleng kha niin Sudan-a Khartoum atanga Ethiopia khawpui, Addis Ababa pan an ni.
Air Traffic Control (ATC)-in flight ET343 hi biakpawh an tum a; mahse, an hlawhchham zel a. Boeing 737 hi autopilot system-ah dahin feet 37,000 zeta sanga an awm lai a ni a. An thlawh chhuah hma hian thlawhna chhungah darkar hnih leh a chanve zet an inkhung niin a tar lang bawk.
ATC hian vawi tam tak pilot-te hi biak an tum a, an hlawhchham zel a. An tumna tur an pelh fe hnuah autopilot chu in-disconnect-in alarm a ri a, pilot-te hi an harh ta chauh niin Aviation Herald chuan a tar lang.
An hriat chhuah meuh chuan an lo thlawk thui hman fu a, minute 25 hnuah an tum thei ta chauh va, him takin an thleng ta tho a ni.
Aviation surveillance system ADS-B pawhin thlawhna hian an tumna tur an pelh ngei thu a sawi a. Thlawhna thlawh dan an tar lanah chuan Addis Ababa tumhmun atanga hla tak thlengin an let leh tih a lang thei.
Aviation analyst Alex Macheras pawhin he thil hi Twitter-ah tar langin ‘thil ngaihven ngai tak’ a nih thu leh pilot-te rimtawng chu thil tha lo a nih thu a sawi.
Hetiang deuh bawk hian May thla khan New York atanga Rome pan thlawhna chu feet 38,000-a sanga an awm laiin a khalhtu pahnih an lo muthlu tawh a. Chhuituten an chhuinaah chuan ITA Airways thlawhna Airbus 330 khalhtu pahnih hi France chunga an thlawh lai vel atangin an muthlu niin an sawi.