Aizawl tui tlan ber, Tlawng lui tui chu chemical biological leh medical lam bawlhhlawh a tam avangin mihring hriselna atan a hlauhawm thu sawi a ni.
Aijal Club huaihawtin nimin khan Aijal Club lounge-ah ‘Aizawl Tui Tlan Chungchang; sawihona a ni a. Sawihona hi RL Rinawma (IRS Rtd)-in a kaihruai.
Sawihonaah hian Lalrammawii Sailo (IFS) EF&CC; Er H Duhkima, Director PMU PHE; Prof John Zothanzama, HOD, Dept of Biotechnology, Mizoram University; Vanlalhrima, General Secretary Save Mizoram River leh Zothanmawia, MCS, Commissioner AMC te an tel a ni.
Aizawl tui tlan chungchang sawihonaah hian ram ngaw chereu zel avanga Aizawl tui tlan ber lui tui kiam lam pan zel chu ngaihmawhawm tak a nih tawh thu leh lui a lei nawi tam ta lutukin harsatna chi hrang hrang a siamte sawi chhuah a ni a. Chemical biological leh medical lam bawlhhlawh tuiah a tam thu leh hengte hi mihring hriselna atan a hlauhawm thu sawi niin, Tlawng lui tui pawh World Health Organisation (WHO)-in mihring tlan atana thianghlim a tih chin a pha lo hle tih an sawi bawk.