Aizawl: Birmingham khawpuia Commonwealth Games 2022 neih zawh taka India ram aiawha medal latu Mizo pahnih – Jeremy Lalrinnunga leh Lalremsiami te chu Mizoram sorkarin chawimawiin, lawmpuina sum fai a hlan nghal.
Zirtawpni zan khan chawimawina inkhawm buatsaih hi Chief minister Zoramthanga’n telpuiin, Mizoram sorkar aiawhin gold medal dawngtu, Jeremy Lalrinnunga hnenah Rs. nuai 25 a hlan bakah, bronze medal latu, Lalremsiami hnenah Rs. nuai 7.5 a hlan bawk.
He hunah hian thu sawiin chief minister chuan mahni chawr chhuahna chhungkaw khawsak san leh san loh chu hlawhtlinna leh thlen chin hriltu a nih vek loh thu a sawi a. Tute mai pawh hi thiamna leh theihna neia siam vek an ni a, thiamna inang reng pawh a hmangtuin a hman dan azira mi hlawhtling leh tling lo, thleng thui leh thui lote inthlauhna a siam thin tih sawiin, Jeremy Lalrinnunga leh Lalremsiami ten hlawhtlinna chang tura an beihna leh an tumruhna piah lamah an chhungte tawiawmna chu fakawm a tih thu a sawi.
Home Minister Lalchamliana pawhin thu sawiin infiamnaah kawnga hmasawnna leh ram hmasawnna hi kal kawp a nih thu a sawi a. Commonwealth Games 2022 neih zawh taka India ram aiawha medal latute chu an thalaipuite tana entawn tlak an nih thu sawiin, “Infiamna chauh ni lo, khawvel nun kawngah hian hlawhtling turin thil tam tak a awm lo – tumruhna, inpek zawhna, nghah peihna, mahni inthununna te hi hlawhtlinna kawngah min kaihruaitu a ni,” a ti.
Mizo infiammi pahnih chawimawina hun thlengtu, Sports & Youth Services department Minister Robert Romawia Royte pawhin Mizoram sorkarin infiamna chawisan a ngaih pawimawh thu sawiin, thalaite mamawh phuhrukna tur theih ang ang – hmasawnna ruhrel din kawngah leh kawng danga theihtawp chhuah a nih thu a sawi.
He inkhawmah hian Lalremsiami leh Lalrinnunga te bakah Hockey Mizoram President Zothankimi leh Lallianthuama, Mizoram Weightlifting Association President ten thu an sawi bawk.