Congress party hruaitu hlun tak, Anand Sharma chuan Pathianni khan Himachal Pradesh unit-a steering committee chairman a nihna atangin a bân thu a puang veleh a, hemi hma lawk hian Jammu & Kashmir-ah a nihna dinhmun ang chelhtu tho, Ghulam Nabi Azad a lo bâng tawh bawk.
Congress President Sonia Gandhi-i hnena Himachal Pradesh inthlan hma lawka lehkha a thehluhah Sharma chuan inthlan hma lawkah party thutlukna siam atanga a bân thu leh ama zahawm nana ti a nih thu a tar lang nia sawi a ni.
“Congress hlun tak leh ka tih tawhah chuan din nghet thin ka ni a, thil hrang hrangah min telh loh leh rawn lohna a awm fo va, keima zahawmna vawng chungin, hei bak hi duhthlan tur dang ka nei lo a ni,” tiin Twitter-ah a tar lang bawk.
An party inrelbawl dan siam that duha an president hnena lehkha thawntu an hruaitu mi 23-te, G-23 an tih zinga an puipa ber pakhat, Azad-ah pawh Jammu & Kashmir inthlan tura campaign committee chairman a nihna leh political affairs panel-a member a nihna a lo bânsan tawh bawk.
Sharma chuan Congress chief hnenah hian an hmaa inthlan lo awm tura inbuatsaihna hrang hrangah rawn a ni ve ngai lo niin a insawi a. A nihna kalsan mah se an party candidate-te tan a campaign dawn tho tih a sawi bawk.
Union minister pawh lo ni tawh leh Rajya Sabha-a Congress deputy leader hlui, Sharma hi April 26 khan Himachal Pradesh-ah hian an party steering committee chairman atan ruat a ni.
Azad-a leh Sharma hi an party hruaitu lawk tak tak, an kal dan siam that duh, G-23-a tel ve ve an ni a, heng hruaitute hian an party tuaithar leh a nih theih nan party chief hnenah rawtna eng emaw zat an thlen a, hruaitu insiksawi leh inrelbawl dan thlak thlengin an rawt a ni.
G-23-ah hian an hruaitu lawk dang – Bhupinder Singh Hooda leh Manish Tewari pawh telin inthlanna hrang hrangah an chet chhiat theih em avangin an party chuan insiksawi an mamawh niin an ngai a. A hniam ber atanga party chhunga thuneitu sang ber, Congress Working Committee thlenga siksawi leh insiam rem an ngai tiin rawtna a ni.
Sharma hi Himachal Pradesh-ah chuan an party hruaitu langsar ber pakhat a ni a, Congress president hnena lehkha a thawnah a zahawmna palzut a ni a, party thutkhawm pawimawhah rawn loh leh sawm loh a hlawh fo niin a sawi a ni.
Congress hian kumin kum tawpa Himachal Pradesh assembly inthlan neih turah BJP paih thlak theih an inbeisei a, hetih lai hian Arvind Kejriwal-a kaihhruai Aam Aadmi Party (AAP) chuan a vawi khat nan an chuh ve dawn.
A vawi khat nana kum 182-a assembly inthlan chuhtu, Sharma hi kum 1984 khan khatih laia prime minister, Indira Gandhi-i’n Rajya Sabha inthlanah dintirin hemi hnuah hian rorelna in sangah hian a la thu ngar ngar a, an party-a chanvo pawimawh tak tak a lo chelh tawh bawk.