- Lallunghnema, Charity Lodge
Ka article lo chhiar thin tute chibai tha ber ka buk a che u. In ngaihhlutawmin ka ngaisang che u a ni. Nangni, ‘reader’ tel lo hi chuan article ziah hian awmzia a nei lo va. Chhiartu in awm loh chuan Sap hla lar tak pakhat ‘Money for nothing’ tih ang deuhvin engmah atan a ni lova. Engmah a ni hek lo.
Chuvangin nangni chhiartute u, taima takin ka article hi lo chhiar zel teh u, in zarah kan ngaihtuah zel ang a, kan ziak ang a, kan zial bawk ang a. Tichuan,thu chu tisaah a lo chang thei chauh dawn a ni.
Hei, ka sawi hnu,ka sawi leh dawn! kum 25 vel lai chu article ziakin Lehkhabu ka ziak ve ta nual a.Consumer thil deuh vek a ni. Keini ho buaipui hi in hriat angin consumer interest a ni tawp mai a. Kei ve hian ka ziak a, ka sawi a, ka buaipui a ni ta ber mai !Ka fin vang nge,ka at vang ka hre hrang lo.Ka vei vang a ni deuh ber zawk awm e..
Consumerte hian eng lai pawhin an tuar reng a,thenkhat chuan an tuar tih erawh an la hre lo fo.Hei tak hi hrilh hriat an ngai a ni.Chuvangin consumer right chungchang ziak leh sawi hi bansan hleih theih pawh a ni ta love.Kei phei hi chuan ka atchilh bur mai a. Consumer justice sawi hi Pathian thu sawi tlukin ka tuipui ta a ni ber.Pathian thu tluk a ni,ka tihna erawh a ni lo a nia! Pathian rawngbawlna hlang ,Kohhran rawngbawlna hi a tluk thuak ka tihna a ni.Heng consumer ho tana pen chhuah hi ka lawmna ber a ni zel dawn bawk.
Hetih rual hian zawhna chhan har tak ka tawng fo mai nia maw le!.
Eng vangin nge hetianga consumer thil i buaipui tak chiam mai le?
I hlawkpui em?
Mi i puih hian pawisa i la ve thin em? Kei chuan, mahni ral zel mah ila,consumerte an zalen dawn phawt chuan ka lawm em em thin.Hloh chu hlepah ka ngai hmiah. Nia, kan bei zel dawn, kan tawlh kir dawn tawh lo,ka ti ve ta hmak mai! Hei hi mipui politics,consumer politics a ni a, ka khel, ka ti hmiah hmiah mai a ni..Dawrkai leh sumdawng chapo deuhte hmel han hmuh ni khua te phei hi chuan anmahni dawrtu ni lo mahila, ka lo teu nasa thin khawp mai. Inrawlh tak hial chang ka nei thin a ni.
Ka Huang hnuhnung berah khan Mizoram State Commission thubuai remna ka rawn tarlang a. Ka lo thlir ve dan chuan State Commission khan opposite party kha an chawi tlem tir ka ti deuh a ni. Bungraw man hu aiin a tam awrh chauhva. Mental Agony charge-ah Rs. 2000/- a ni a. A bak chu bungraw man hu compensation Rs. 57000/- chawitir an ni a. Complainant khan ukil a ruai leh nghal a. Ukil rawih man a awm leh ngei ang.Hnehna erawh a hlu em em a ni.
Consumer Commissiona Ukil rawih hi compulsory a ni lova. Rawih loh ngam a tha. Activist leh organisation lam pun a tha mai, ka ti a ni.Consumer,harsatna neite pui tur mi inpe kan awm reng a nia. Chuvangin Consumer Commission-ah hian Ukil ruai lova, complaint theh luh a, mahni ‘in-borti’ ngam a ngai a ni. Ukil ho rawih hi intihhmuh fo loh a tha. Ukil ruai ho hian thiam an chang chuang lo,tih hriat tur a ni.
Consumer Commission te hi social court tih an ni thin, tih thu ka sawi fo mai. Khawvel zawng zawng a Court rang ber a nih thu pawh ka sawi uar thin khawp mai. Civil Court case anga kum tam veitir kher a ngai lo. Hearing tih tut tlut hi social courtah hi chuan a inhmeh lo.Ni 90 chhung a chinfel ngei ngei tur a ni, ‘zi ri thawh!! Case a zira chinfel zung zung hi consumer thought a ni.
Consumer Right hian a huam zau hle a. Pawisa senga thil lei chi hrang hrang, pawisa senga service hmangtu chi hrang hrang te hi a huam vek a ni. In luahtute pawh a huam a,cubic lung leitute pawh a huam bawk.Chingit leh maian leitute pawh a huam!Hemi chungchangah hian Consumer Court a ka thawh lai khan ka thawhpui thenkhat te nen kan inhnial deuhva ka thian pakhat chuan Bazara mi thil lei chauh consumer right hian a huam turah a lo ngai pek a. A fin thlak lo ka ti hle a. Ka hrilhfiah ta chiam mai a. Pu Hnema hian consumer right a hre ber” a tih phah fo nia? Hre ber lo ka inti a, mahse mimala buaipui nasa ber zinga mi chu ka ni ka inti ve. Mahse, ka beih hi a la nep hle chu ka ti a ni.
Service Provider zingah hian Ambulance Operation hi a tel ve ngei a ni chek ang. June ni 9 khan Bengaluru VIth Additional Consumer Disputes Redressal Commission chuan Judgement tichhuakin Ambulance Operator pakhat chu pawisa a lo lak tawh refund tur leh compensation Rs. 15000/- lai chawi turin thutlukna a lo siam ta a ni. Hetiang hi thil lo thlen dan chu a ni. Thawnthu sawi ang deuhin ka han sawi ang e.
Kum 2016 December ni 19-ah chuan Chandigarh a cheng Sandeep Sharma chuan chest pain(awm bawr vel na a ni mai ang ch-llh) avangin Bilaspura Appollo Hospital-ah hruai a ni a. A natna chu a lo nasat deuh tawh avangin an doctor te chuan Damdawi In tha zawk leh changtlung zawk pan turin thurawn an pe a. A rang thei ang bera Bengaluru pan tuma inbuatsaihin thlawhtheihna an ngaihtuah nghal chung chung a. He thlawhtheihna tum hmuna Ambulance Operator Bineesh Paul a chu an be nghal bawk a. Bineesh-a chuan Rs. 4 lakhs advance pek a tul thu a lo hrilh a. Pawisa chu an pe nghal mai bawk a. Mahse an hmanhmawh teh reng nen Ambulance Operator Bineesh -a chuan Chakarbhata Airport chu non-commercial airport a niin Ambulance hmanna chi a nih loh thu chhuanlama hmangin Rs. 5.5 lakh a dil belh leh a. Hetih chhung hian dam lo, Sandeep Sharma chu vanduaithlak takin a boral ta hlauh mai a. Ambulance Operator hnenah hian an pawisa pekte chu pe kir leh turin dam lo chhungte hian an ti a. Mahse, Ambulance Operator hian chhuanlam chi hrang hrang siamin Manoj Sharma (damlo unaupa) beisei chu an tihpuitlin sak duh lova. Manoj-a mangang chuan District Consumer Commission chu a pan a. A zualko ta a ni. Hemi chungchang hi ngun taka an ngaihtuah hnuin Ambulance Operator lamah hian Deficiency in Service awm ngei a puhin thiam loh an chantir ta a. Ambulance Operator hian Rs. 3.8 lakh a pekir ang. Chu bakah Rs 10000/- a chawi bawk ang a, Commission hnena complaint theh luhna a senso man hu Rs. 5000/- a chawi bawk ang.Ambulance neitu hian a sual man a tel a ni ber.
Hetiang hi a nih thin avangin ambulance service hmangtute hi Consumer Protection Act, 2019 sawi angin consumer an ni a; dikna leh chanvo an nei a ni.Zalenna pawh an nei.CPA hian a huam zau em em a ni.
Mizoramah pawh hian private leh pawl hrang hrangin Ambulance an nei ve ta fur a. Heng hmanraw neitute hi service provider an ni a.A hmangtute hian nasa takin dikna leh chanvo an nei tih lo inhria se, tiin thahnem ngaihna thinlung atangin ka han tarlang a ni.A tawp nan hei chauh hi ka belh duh.
- Harh chhuah a hun tawh tak zet a ni
I chakna cpa a ni.
I ralthuam cp rules,
I chhiar tur lpgas control order
I hriat tur legal metrology act
I zir tur essential commodities act
I nitin khawsak innghahna an ni e,
Dan rangkachak chu!!