Meta chuan influencer lar Andrew Tate chu an platform lian Facebook leh Instagram atangin an petchhuak.
Kickboxer hlui ni bawk hian Meta politicies, ‘Mimal leh pawl tana hlauhawm’ an tih huangah a intat lut, tih a ni a, chu taka chuan an kalpung kalh a nih vanga Facebook leh Instagram-a khap bur a nih thu tarlan a ni.
Andrew Tate hi 2016 khan UK reality TV show Big Broter atanga hriatlar niin, video tawp lama a kawng hreng hmanga hmeichhe pakhat a vuat lai tihlan a ni leh si chuan boruak a vaw hot hle a, online lamah phochhuah niin, chai luih luih nghal a ni.
Hemi kum vek hian hmeichhia te hi pawngsual an nih chuan an mahni thiam loh emaw mawhphurhna chen an nei, tiin tawngkam a chhakchhuak leh a, hei pawh hi an khel nasa hle.
A thu ziah leh comment duh dan hi a him lovah ngaiin Twitter chuan an platform atangin lut leh tawh lo turin an petchhuak. A thu kalpui duh dan lo tuipui tawk leh phurpui an awm ve nual avang leh huhang a ngah bawk si avangin thuneitute lu pawh a tihai fo thin.
Kum 35 mi hian Instagram-ah follower maktaduai 4.7 chuang a nei mek a, tunah chuan Instagram-ah luh an phalsak tawh loh vangin a khawvel chu eng emaw chen a zim sawt dawn a ni.