India hmar leh khawchhak lama tun hnaia fur ruahtui tam tak tla avanga tui lian leh lei min nasa tak avangin mi 50 vel an thi.
News agency Reuters chuan Himachal Pradesh, Uttarakhand leh Odisha-ah ni thum liam ta chhungin mi 50 vel an thi niin a tar lang a ni.
Ruah sur nasa avanga chhiatna thleng hian Himachal Pradesh leh Uttarakhand-ah chuan khaw tam tak a tibuai a, hluma sak in a len chhia a, kawngpuiah tui a lian a, lei a tichhe nasa hle bawk.
Indian Meteorological Department chuang heng lai hmunah hian ni hnih vel ruah tam tak a la sur chhunzawm dawn niin a sawi.
Himachal Pradesh-ah hian sabereka khuangkai leh lei min avanga mi panga chin hriat lohva awm chu Pathianni chawhnu thleng pawh khan an hmuh an la ni lo tih thuneitu sang pakhat chuan news agency PTI a hrilh.
Inrinni bikah ringawt khan he state-ah hian ruah sur kaihhnawihah mi 22 an thi a, mi 12 velin hliam an tuar a. Mandi, Kangra leh Chamba district-ah an tuar nasa zual.
Himachal Pradesh-ah hian ni thum liam ta chhungin mi 36 vel an thi a, tui lianin chenna in a chim mi eng emaw zat chu relief camp-ah dah an ni bawk.
Uttarakhand-ah pawh Inrinni khan hmun tam takah ruah bawhawk a sur a, lui lian thutin a kama cheng mi pali lain an thi a, mi dang 13 pawh an chin hriat lohvin an awm mek a, chenna in eng emaw zat a chhe bawk a. Chhanchhuah hna thawktuten tangkhangte lak chhuah hna an thawk mek.
Odisha-ah chuan ruah sur nasa avanga chhiatna thleng kaihhnawihah mi paruk vel an thi bawk.
Tui lianin mi nuai riat dawn tibuaiin mi sang tam takin an chenna in chhuahsanin hmun him an pan a, electric leh tui lakna a chhia a, kawngpui pawh a chhe nasa hle a. State sorkarin mi 1,20,000 chuang hmun himah a thiar chhuak tawh.
Odisha-ah hian an state hmar lama luite chu tun hnaia Bay of Bengal atanga inmung ruah sur nasa avangin an chim chin a sang tawh hle hlawm a. Jharkhand atangin Galudih barrage-ah tuikhuah sah a nih bawk avangin tui chim chin hi a san phah zual.
Jharkhand-a Ramgarh district-ah Inrinni khan Nalkari lui lianin mi panga a la a. Ruang pali hmuh tawh a ni tih district thuneitu sang, Madhvi Mishra chuan a sawi a, pakhat hi zawn mek zel a ni.